380 iudocas participan este sábado nun campionato en Lugo

Hoxe celébrase en Lugo a fase final do Campionato Galego Escolar de Iudo nas categorías de infantil e cadete, cunha participación de 380 iudocas. Trátase dun deporte do que en Galicia hai preto das 10.000 licenzas.

Esta proba é computable para o campionato de España que se celebra en Huesca a finais de abril.

Malia que hai numerosos seareiros deste deporte de contacto físico, o certo é que moitos deles están nas primeiras idades da vida. O reto da Federación é manter o número de iudocas en idades superiores, cando a práctica deste deporte adoita complicarse debido ás circunstancias vitais.