Aguiño e Carreira renden homenaxe aos náufragos do Cartagena oitenta anos despois
Maquetas do barco, ofrendas florais no porto e a proxección dun documental inédito sobre o naufraxio
Foi o 8 de abril de 1945 nos baixos do Rinchador, en Corrubedo e morreron os 21 tripulantes do barco
O 8 de abril de 1945 un barco, o Cartagena nº 3, foi a pique. Morreron os 21 tripulantes, todos veciños de Aguiño e Carreira. Oitenta anos despois os veciños das dúas localidades réndenlles homenaxe a estas vítimas e a todas as vidas que quedaron no mar, cunha ofrenda floral, conferencias e a proxección dun documental sobre a historia da maior traxedia na historia das dúas localidades.
"Foi unha traxedia moi grande"
"Era unha noite mala, de lúa chea e o mar era rexo"
"Saíron ás oito da mañá e ao día seguinte estaban mortos"
Son algúns dos testemuños recollidos nun documental inédito sobre o naufraxio do Cartagena nº 3. A casa do mar de Aguiño quedou pequena para acoller os veciños que quixeron lembrar ou coñecer a histora dunha traxedia silenciada durante oito décadas.
Foi o oito de abril de 1945. Este pesqueiro do porto de Aguiño con 21 tripulantes a bordo afundiuse nos baixos do Rinchador en Corrubedo.
"Cando rompe un barco no Rinchador non hai deus que se salve".
Non houbo sobreviventes e só se recuperaron os corpos de catro das vítimas
"Naquela época era algo complicado dicir que atopaches un defunto".
"O Ciprián Vila veu á casa e estivo toda a noite no velorio e ao día seguinte enterrárono, acórdome ben".
"Meu pai veu á casa, foi o único home que eu lembro de ser afogado e vir á casa".
Os organizadores da homenaxe que se celebra oitenta anos despois non queren que a historia do Cartagena se esqueza.
"Falamos do ano 45 e quedan moitos flecos por resolver pero isto axuda tamén a que entre uns e outros podemos completar a historia e facela coñecedora para as próximas xeracións", explica o patrón maior de Aguiño.
Unha historia e unha homenaxe que saíu á luz grazas á vontade e ao empeño dun maquetador de barcos, que primeiro foi mariñeiro en Carrerira.
"É o que estamos celebrando, o 80 aniversario, para lembrar as vítimas do 'Cartaxena' pero tamén a todos os mariñeiros que no seu día quedaron no mar, caso especial do meu pai ,que quedou nas augas de Terranova", lembra Luis Crujeiras, maquetador de barco.
A homenaxe finalizou cunha ofrenda floral e a presentación da maqueta do barco afundido.
