Éxito da terceira edición do Salón do Vehículo Clásico en Expourense
A feira está tendo un crecemento exponencial, duplica tanto o número de visitantes como de expositores
Un dos principais atractivos desta edición é un Porsche 901, a única unidade que se conserva na península Ibérica
O seat 124 FL, de cincuenta aniversario, é un dos protagonistas do salón. Deseñado como coche familiar, acabou competindo en Montecarlo.
"Á parte de lograr sete campionatos de España, no ano 77 tiveron un fito histórico ao quedar de terceiros e de cuartos no campionato do mundo, no Rally de Montecarlo", relata Guillermo Sousa Fernández, socio do Club Nacional Seat 124.
A mostra agocha numerosas curiosidades, desde o Porsche 911 de Félix Rodríguez de la Fuente, a un Porsche 901, do que só se fabricaron 82 unidades.
"É o único exemplar que hai na península Ibérica desas 82 unidades, que son as que se fabricaron, non significa que aínda existan", explica Paco Fernández, presidente da Escudaría de Clásicos de Ourense.
Os amantes dos clásicos tamén poden conseguir aquí recambios, difíciles de atopar no mercado convencional.
"En tendas e talleres especializados que pecharon e teñen pezas esquecidas, do estranxeiro -Italia, Francia...- imos conseguindo pouco a pouco o que o público precisa", comenta Christian Fernández, de Recambios de Época.
Este Ford Fiesta foi construído desde cero por alumnos dun taller de formación.
"É un vehículo clásico pero prototipo, feito con dúas unidades de vehículo antigo", salienta Antonio Casas, do Centro de Formación Talleres José María.
Charlas e competicións completan o cartel do salón, que ata nos propón rutas alternativas para conducir sen présa, como a nacional VI.
"Convertendo a antiga estrada entre Madrid e A Coruña nunha Ruta 66 á galega. Trátase de vir en tres, cinco, sete días...", asegura Silvia Vázquez Lorenzo, da Ruta Nacional VI.
Amodiño competiron tamén un grupo de moteiros nunha carreira de lentos. Perde quen primeiro bota o pé ao chan.
