Ferido o traballador dun restaurante de Santiago tras declararse un incendio na cociña
O traballador sufriu queimaduras por aceite, segundo informa o 112
O lume queimou a cociña por completo e o fume afectou ás vivendas máis próximas; o edificio lindeiro foi desaloxado de maneira preventiva
O incendio comezou contra as catro da tarde deste sábado
Un traballador foi trasladado ao hospital tras sufrir queimaduras con aceite ao declararse un incendio na cociña dun restaurante da praza de Cervantes, en Santiago.
O lume comezou contra as 16 horas deste sábado, segundo informa Emerxencias de Galicia. O 112 informou que as lapas queimaron a cociña por completo e que o fume se estendeu ás vivendas máis próximas. De feito, o edificio lindeiro tivo que ser desaloxado de maneira preventiva.
Os bombeiros municipais chegaron rapidamente ao lugar, extinguiron as lapas e procederon á ventilación do local, mentres que Urxencias Sanitarias de Galicia-061 confirmou o traslado dun traballador polas queimaduras que sufriu con aceite.
No operativo tamén participaron os axentes da Policía Nacional e Local.
