Un ucraíno da rexión do Donetsk é o suposto autor do acoitelamento de Ámsterdam
Na agresión, ocorrida o xoves pasado no centro da capital neerlandesa, cinco persoas quedaron feridas
Foi identificado o presunto autor do acoitelamento múltiple rexistrado no centro de Ámsterdam o xoves pasado, no que cinco persoas quedaron feridas, dúas delas de gravidade.
Segundo informou este sábado a Policía da capital neerlandesa, o home arrestado tras a agresión é un ucraíno de 30 anos orixinario da rexión de Donetsk, ocupada en gran parte por Rusia e anexionada en setembro de 2022.
A Policía tivo dificultades para establecer a identidade do sospeitoso porque tiña documentos con varios nomes cando foi detido. Este martes pasará a disposición xudicial.
Os investigadores subliñan que aínda non están claros os motivos do suceso, que tivo lugar nunha rúa próxima ao Pazo Real, na praza Dam, unha das máis concorridas de Ámsterdam.
Axuda dun cidadán británico
Tras acoitelar cinco persoas, o home foi detido momentos despois na rúa Gravenstraat coa axuda dun cidadán británico, que tirou o presunto atacante ao chan e colocouse enriba para inmobilizalo ata que chegou a Policía.
"Este home tomou unha decisión nunha fracción de segundo que merece moito recoñecemento", subliñou a alcaldesa de Ámsterdam, Femke Halsema, que o condecorou coa insignia de heroe da cidade.
O arrestado tamén resultou ferido e foi atendido no hospital penal de Scheveningen. A Policía urxiu as testemuñas do suceso a compartir "calquera vídeo do incidente na rúa Sint Nicolaasstraat" que poida axudar na investigación.
