Xoguetes da infancia para adultos nostálxicos

Nunca nos abandonou. O vintage, as antigüidades e os produtos con historia sempre estiveron de moda. Pero agora estase a notar tamén no ámbito dos xogos de lecer. Xente con corenta e cincuenta anos que merca enredos que non puideron desfrutar na súa infancia e que agora, con máis poder adquisitivo, deciden facer realidade neste momento. 

"Agora hai moitas máis cousas, xoguetes, cousas relacionadas con series e películas da época de cando eramos rapaces. Nós ou a xente de cincuenta anos, explica Roberto Sanmiguel, de Alita cómics en Santiago de Compostela.

Iso que en inglés se denomina cultura kidult, o coñecido mercado da nostalxia, a medio camiño entre o adulto e o infantil, está a aumentar as súas vendas e xa representa un vinte por cento das contas das xogueteiras.
Trátase de adultos que mercan xogos da súa infancia para revivir esa etapa vital do recordo en forma de xoguetes, figuras de coleccionismo ou xogos de mesa de varios centos de euros.

"Este xogo é unha edición do Heroquest, un xogo que foi moi popular hai anos; é un exemplo dun entretemento que marcou a infancia de moita xente e que volveuse agora a publicar e que amosou canta xente estaba disposta a volver telo, que lle gustaba", confirma Roberto Sanmiguel.

Os xogos de cartas máxicas, para coleccionar ou para usar, tamén protagonizan o lecer de adultos e mozos, en formatos que levan activos xa décadas. "É como volver ter ese neno de volta, a desfrutar dos momentos cos amigos e ter unha bonita nostalxia que achega moitísimo á vida da xente", recoñece algún dos habituais practicantes destes xogos.

A diminución da natalidade e a cotización da nostalxia fan desta cultura da infancia un valor cada vez máis apreciado na industria. O xogo, non sempre é cousa de nenos.