Na Festa de Arcade esperan que se consuman máis de 50.000 ostras esta fin de semana
A festa prolóngase toda a fin de semana e supón un recoñecemento para este molusco tan representativo de Arcade e tan valorado polos visitantes
As degustacións son na carpa instalada no peirao de Arcade
A ostra de Arcade ten todo o protagonismo esta fin de semana en Soutomaior. Por tradición e sabor, a festa atrae moitos visitantes, polo que este sábado xa se achegaron centos de persoas ata o peirao de Arcade para degustar as ostras ao natural, que comezaron a servir ao mediodía.
Pero a festa non remata aínda, prolóngase toda a fin de semana. O domingo é o día grande. A festa comeza ás 10 da mañá xa con pasacalles da Banda Artística de Arcade e a Banda Cultural de Arcade desde o Calvario.
Ás once da mañá van comezar a abrir as casetas de degustación e despois ao mediodía vai actuar o grupo de jazz Fernando Sánchez Jazz Cuartet.
O ano pasado consumíronse 50.000 ostras e nesta ocasión confían en alcanzar ou superar esa cantidade.
O pregón deste ano corre a cargo dun monologuista, de Celso Fernández Sanmartín "Celsiño", un veciño de Soutomaior nado en Lalín.
