Pecha en Cuntis a fábrica que lle subministraba as velas ao Juan Sebastián Elcano
O grupo estadounidense North Sails clausura a factoría en Galicia para levar a produción a Sri Lanka
Este luns entregaralle as cartas de despedimento ao cadro de persoal, integrado por 26 persoas
Despois de corenta e sete anos de actividade en Cuntis, a fábrica de velas para embarcacións da firma estadounidense North Sails deixa de producir en Galicia e encamíñase cara ao peche definitivo.
O grupo entregaralle este luns as cartas de despedimento ao cadro de persoal, integrado por 26 persoas. Catro delas, permanecerán vinculadas á empresa ata finais de ano para colaborar no proceso de desmantelamento das instalacións.
Os propietarios da compañía acordaron concentrar a produción noutra planta situada en Sri Lanka. A nave, á beira da N-640, conta con tres plantas e foi durante décadas un referente internacional na confección de velames.
Subministradora do buque escola
Fundada no 1978 por Pedro Campos, presidente do Real Club Náutico de Sanxenxo e anfitrión do rei emérito durante as súas visitas a esta localidade, está situada no polígono da Ran.
Nun primeiro momento chamouse 'Ver Campos'. Despois, comprouna un grupo danés e, finalmente, foi adquirida por North Sails.
O pasado mes de novembro, a factoría resultou adxudicataria da subministración de velas para o buque escola Juan Sebastián Elcano, no que navega a princesa Leonor.
Comunicado do concello
O Concello de Cuntis lamentou o peche da fábrica e asegurou estar a traballar para buscar alternativas e apoiar o persoal.
"Desde o momento en que se tivo coñecemento da intención de peche por parte da dirección da empresa, o Concello de Cuntis realizou xestións para tratas de evitar esta decisión", apunta o consistorio nun comunicado.
Con todo, malia os "intentos de mediar e solicitar unha reunión" cos responsables do grupo americano North Sails, "non foi posible reverter a decisión unilareral de trasladar a produción fóra de España".
O goberno local lamentou esta decisión, "de carácter puramente empresarial" por parte dunha entidade privada que no seu momento recibiu axudas públicas para a súa modernización, supoña a "perda dunha unidade de produción en Cuntis".
Plan de empregabilidade
O Concello asegurou que xa se atopa traballando activamente cos propietarios da fábrica para explorar a implantación dunha nova actividade produtiva.
Ademais, "colaborará estreitamente" co Goberno central e a Xunta na elaboración e implementación dun plan de empregabilidade específico para as persoas afectadas.
