O Colexio de Arquitectos de Galicia entrega os premios ás obras máis relevantes

O Colexio de Arquitectos de Galicia entregou esta tarde en Compostela os premios ás mellores obras arquitectónicas e urbanísticas galegas dos dous últimos anos. Na entrega destes premios citáronse no pazo de Congreso de Santiago arquitectos e autoridades políticas.

Presentáronse arredor de 250 candidaturas para once categorías, finalmente houbo trece premiados, dous deles ex aequo. Premiáronse os mellores traballos feitos na nosa comunidade, pero nesta ocasión tamén se incluíron por primeira vez dous proxectos realizados fóra de Galicia: en Xenebra (Suíza) e Ica, no Perú.

"A boa arquitectura ten que ter de todo, iso quizais é o máis difícil da nosa profesión. A nosa disciplina ten que ter unha boa construción, ten que ser economicamente sostible, ten que ser medioambiental sostible, ten que ter a capacidade para desenvolverse nun lugar específico, non todo vale para todos os lugares e iso é o que recoñecen estes premios", explica Luciano G. Alfaya, decano do Colexio Oficial de Arquitectos de Galicia.

Entre os galardóns, salienta a restauración do mosteiro de San Martiño Pinario, eloxiada pola súa sensibilidade patrimonial, e a reforma do edificio administrativo de San Caetano, recoñecida pola súa sustentabilidade e funcionalidade.

Entre os premiados están trece obras e proxectos en Carnota, Gondomar, Santiago, A Coruña, Porto do Son, Barro, A Pobra do Caramiñal, entre outros.

Todos os galardoados destacan o compromiso coa innovación e con que a boa arquitectura fai cidades mellores e mellora a calidade de vida. Ademais, subliñan a importancia de preservar o legado natural e cultural.

O arquitecto Alberto Noguerol foi distinguido a título póstumo co galardón á súa traxectoria profesional.