O edificio Redeiras da UVigo, seleccionado na Bienal de Arquitectura de Venecia

Un edificio da Universidade de Vigo no barrio do Berbés foi seleccionado para participar na Bienal de Arquitectura de Venecia.

A rehabilitación é obra do estudo de arquitectura Abalo Alonso de Santiago. Trinta anos de profesión e unha manchea de recoñecementos e premios avalan a traxectoria desta parella de arquitectos establecidos en Compostela.

O edificio Redeiras, sede institucional da Universidade de Vigo no Berbés, é unha das 16 obras elixidas para representar España na Bienal de Arquitectura de Venecia. O proxecto permitiu rehabilitar tres antigas casas de mariñeiros nun único inmoble.

"Estar na Bienal de Venecia supón un recoñecemento moi importante e supón unha proxección internacional da obra, do noso estudo, tamén da Universidade de Vigo. Somos moitos os que nos sentimos beneficiados", admite a arquitecta Elizabeth Abalo.

"É unha obra que nos trouxo moitas alegrías nestes catro ou cinco anos. Desde que estaba en obra tivo visitas de compañeiros", recoñece o arquitecto Gonzalo Alonso.

Elixida entre preto de 200 propostas, será a única representante galega na exposición. Destaca polo seu compromiso co medio e o patrimonio.

"Creo que é traer a tradición á modernidade, e eses son valores que forman parte do noso traballo", di Elizabeth Abalo.

"É sostible porque estamos volvendo usar o noso patrimonio. Outra das razóns é o uso da madeira, que é probablemente o material máis sostible que temos. E aínda máis co uso das novas tecnoloxías que temos, que o fan máis económico. Eses son algúns dos argumentos deste éxito" asegura Gonzalo Alonso.

Este estudo traballa xa noutros dous proxectos singulares, a reforma da Facultade de Medicina e da de Historia da Universidade de Santiago.