Milleiros de persoas participan en Vigo na recreación da Reconquista de 1809
Sobre as cinco da tarde saía a Milicia desde a praza do Berbés e comezaba a recreación da Reconquista na Porta do Sol
Despois chegaba un dos momentos clave cando os heroes Cachamuíña e Carolo, liderando un exército miliciano, lograban traspasar a porta de Gamboa e poñer fin á ocupación francesa
O bo tempo acompañou a Festa da Reconquista, declarada de Interese Turístico Nacional. Máis de 800 persoas vestidas de época participaron en Vigo na representación dos feitos históricos do 28 de marzo de 1809.
Seguindo o guión marcado pola historia, as tropas francesas foron derrotadas polo pobo e polas milicias, e expulsadas da cidade.
A recreación volvérona seguir un ano máis milleiros de persoas.
"Nós comezamos a preparar a peza todos os anos en xaneiro. Traballan moitísimo con técnicas reais actorais, moito esforzo e moita implicación", destaca María Torres, directora escénica.
Sobre as cinco da tarde saía a Milicia desde a praza do Berbés. A partir das seis comezaba a recreación da reconquista de Vigo na Porta do Sol.
Así vivían a resistencia dos vigueses e viguesas fronte ao invasor. Moitos sumábanse á celebración con traxes de época.
"Nós gañamos sempre, botámolos fóra todos os anos, para que os queremos aquí? Para iso viñeron os portugueses a axudarnos tamén". "Eu son unha das que comezou a festa da Reconquista, comezamos trinta veciños e mira ao que chegou", din varias participantes.
Despois chegaba un dos momentos clave, cando os heroes Cachamuíña e Carolo, liderando un exército miliciano de campesiños e mariñeiros, lograba traspasar a porta de Gamboa e poñer fin á ocupación.
Con esta representación histórica de fondo, a zona vella encheuse de festa, de música e de gastronomía por cada recuncho.
