A Xunta resolve 23.200 expedientes de dependencia e discapacidade co novo plan
Segundo a conselleira de Política Social e Igualdade, débese á redución dos trámites ao introducir o novo modelo de solicitude conxunta
A Xunta resolveu 23.208 expedientes de dependencia e discapacidade nos tres primeiros meses de aplicación do Plan de simplificación e axilización da dependencia e a discapacidade.
A conselleira de Política Social e Igualdade, Fabiola García, fixo balance na súa visita á residencia San Marcos, indica o Goberno galego nun comunicado.
Segundo dixo, as valoracións "avanzan a bo ritmo" e superáronse "as previsións iniciais" de 20.000 resolucións que manexaban. A conselleira manifestou que a estas cifras únese o feito de que "por primeira vez" se superaron as 78.000 persoas atendidas.
Para Fabiola García, este impulso ás valoracións débese, principalmente, "á redución ao máximo dos trámites ao introducir o novo modelo de solicitude conxunta que xa está operativo desde o mes de xaneiro".
O obxectivo deste plan de axilización, no que o Goberno galego inviste 90 millóns de euros, é resolver as solicitudes nun prazo máximo de seis meses.
A conselleira nunha imaxe de arquivo
