'Galicia diversa', serie documental sobre a discapacidade, estrea en AGalega.gal

Diferentes en capacidades, pero iguais en dereitos. Esta é a idea sobre a que pivota a serie documental que a plataforma AGalcega.gal estrea hoxe para dar visibilidade a todas as persoas con discapacidade que loitan por unha inclusión efectiva.

"É fundamental que a CRTVG lles dea voz a todos estes colectivos moitas veces invisibilizados", comenta María Sabucedo, directora da plataforma AGalega.gal

"Nós o que entendemos é que os medios públicos galegos teñen que ofrecer un retrato plural da sociedade galega e que ese retrato estaría incompleto se faltara un sector tan importante como é o das persoas con discapacidade e diversidade funcional e todas as persoas que compoñen a súa contorna", explican Manuel Darriba e Damián Varela, directores de 'Galicia diversa'.

Galicia ten a maior taxa de persoas con discapacidade de toda España, 113 por cada mil habitantes de aí esta serie. Son 5 episodios para abordar 5 puntos de vista, o traballo, a educación, as terapias, o deporte e a arte.

"En cada un deles hai historias persoais de persoas que presentan todo tipo de discapacidades e diversidades funcionais. Aparece a xordeira, a cegueira, o autismo, a parálise cerebral, a discapacidade múltiple", continúan.

Unha desas historias é a de Ánxeles, quedou cega aos 16 anos por mor dun tumor cerebral. Licenciada en Dereito, reivindica a súa competencia laboral pese ás dificultades engadidas.

"Ás veces hai unha visión pois de pobre discapacitado e moitas veces temos que facer máis, que demostrar que non, que somos persoas que cunha adaptación axeitada podemos dar o todo por todo e ter as mesmas competencias que outras persoas", conta Ánxeles Miguélez, encargada de auxiliares de sala na Rede Museística Provincial de Lugo.

Eles son os protagonistas, pero tamén as súas familias, educadores e terapeutas que narran coa maior naturalidade o seu día a día.