Un local de máquinas expendedoras de Noia, vítima de repetidos asaltos
As alarmas frustraron o último roubo, en que os ladróns usaron unha barra de ferro
A dona pide reforzar a vixilancia policial nocturna na zona
Tan só leva un ano co negocio aberto, e xa está valorando pechar. Rocío séntese impotente ante os repetidos asaltos que padecen as súas máquinas expendedoras. No último, unha parella move as cámaras de seguridade para logo tentar forzar cunha barra de ferro o peche dunha delas.
"Quería forzar a máquina coa barra de metal. Subiuse enriba, pero teño un sistema de seguridade que se activa e vibra", explica Rocío Caamaño, a dona de Zona 24 de Noia.
Ao golpear a máquina coa barra, a alarma soou e o roubo quedou frustrado. Pero os asaltantes fuxiron para desesperación desta empresaria.
"Tanto traballo para nada, ao final a xente vén, fai e desfai no local e ninguén resolve nada. Vas á Garda Civil, pero che din que non logran identificar os culpables. Desanima moito".
Di que a primeira vez que lle roubaron puxo denuncia, pero os culpables non foron localizados, así que tivo que asumir os estragos e os gastos dun mes co negocio pechado. Cre que unha maior vixilancia policial, sobre todo pola noite, serviría para disuadir os atacantes. "En Noia non temos policía de noite, estamos desamparados. Teño medo porque a xente fai o que quere".
Estes negocios, sen atención personalizada e con horario nocturno, resultan especialmente atractivos para os ladróns. Mesmo cando saben que poden ser collidos na allada polas cámaras do local.
