Newark dedícalle unha rúa a Mario García, un veciño de Ramirás que se asentou alí en 1973

Nos anos 60 e 70 do século pasado estableceuse nesta área de Newark, no estado de Nova Yersey, xusto a carón de Nova York, unha comunidade de galegos e portugueses que chegou a sumar dez mil persoas. Nesta 'Little Galicia', boa parte eran ourensáns que se dedicaron a traballar no porto, na construción ou na hostalería. Neste ramo destacou Mario García coas súas Spanish Taverns.

Conta a súa irmá Conchita, desde Ramirás, o lugar de orixe da familia, que Mario emigrou primeiro a Venezuela, pero despois de casar, marchou para os Estados Unidos canda outros irmáns que tamén estiveran no país suramericano. Xa en Newark, traballou na industria, coma moitos dos seus paisanos, pero axiña preferiu sacar partido dos seus dotes comerciais montando restaurantes.  

"Empezou nunha fábrica de martelos, pero estivo pouco tempo, porque el era moi comercial. Chegaron a mandarlle de Portugal por avión peixe e marisco; el presumía diso".

Conchita di que Mario se sorprendía cada vez que viña a Ramirás que ela conservase un plato da primeira vaixela do seu restaurante

Mario faleceu en agosto do ano pasado, pero a súa memoria segue moi viva en Ramirás e tamén en Newark onde vive gran parte da súa familia e segue aberto o seu primeiro restaurante. Xusto aí, a carón da Spanish Tavern, o seu nome vaise incorporar agora ao rueiro da cidade, coa Mario García Way. Un recoñecemento que Conchita considera acorde co talante xeneroso de seu irmán, porque amparou, di, a moitos dos galegos que emigraron a Newark coma el. 

"Porque se ti vas para un país descoñecido e encontras unha persoa que che da a man, iso é o máximo que pode desexar unha persoa, que teñas alí un anxo; iso era o Mario. Para nós está vivo e estará sempre ata que nos xuntemos todos alá".