Rúas, garaxes e locais comerciais asolagados tras unha tromba de auga na Coruña
Os bombeiros atenderon este mércores 24 incidencias en apenas unha hora
O paseo marítimo da Coruña quedou completamente asolagado este mércores, pouco despois das oito da tarde, por mor da borrasca Nuria.
"Caeu unha boa tromba de auga en toda a cidade. Coincidiu amais coa preamar ás oito e seis minutos e isto provocou que a rede de sumidoiro non dese abasto, sendo as zonas máis baixas da cidade as máis afectadas", explica Carlos García Touriñán, director de Seguridade Cidadá da Coruña.
A tromba de auga afectou aos viandantes que buscaron acubillo en zonas cubertas, deixando as rúas baleiras.
"Foi espectacular. En tan pouco tempo, tanta cantidade de auga..., era como para ter medo". "As rúas parecían ríos...".
Amais das rúas, quedaron anegados garaxes e baixos comerciais. Un deles foi un ximnasio próximo a Catro Camiños. Estaban na metade dunha clase e tiveron que suspendela e apagar as luces porque comezou a caer auga polo teito e a sala quedou completamente asolagada. Os danos materiais son cuantiosos.
"Polo menos esta sala hai que cambiala completamente: o chan, o teito... E sentes impotencia ao ver que entra a auga e que non podes facer nada", di David Garriga, propietario do ximnasio VIP Training.
Os bombeiros tiveron que atender 24 incidencias nunha hora debido á cantidade de auga acumulada.
