A olería de Niñodaguia celebra a súa fornada tradicional en Xunqueira de Espadanedo
Os oleiros reclaman que se poña en valor a súa louza artesanal
Aseguran que se non se promociona non haberá remuda tradicional
A quinta fornada tradicional de Niñodaguia, en Xunqueira de Espadanedo, sacou hoxe unha mostra da súa olería tradicional para levar aos antigos fornos oleiros.
Os artesáns quixeron poñer en valor unhas pezas que durante anos contiveron a comida e a bebida dos veciños e que hoxe dan fe da súa riqueza patrimonial.
Non hai tanto tempo que a nosa louza pasaba de xeración en xeración en cada casa, e que se conservaba con esmero porque cada peza tiña un uso concreto.
"Esta é unha beleza de peza, era a xerra da auga, a ola de ir á fonte, esta para meter a graxa do porco e esta para o aceite", describe Agustín Vázquez, oleiro.
Estas pezas saían das mans coidadas dos homes, porque eles eran os oleiros. E entón eran as mulleres quen traballaban a terra e as que carrexaban os cestos para o forno. Chamábanlles as apañadeiras.
"Levaban un cesto e unha rolla para a cabeza. Cargaban co cesto cara ao forno e alí o que estaba ía colocando no forno".
En Niñodaguia reclaman que se conserve este patrimonio cultural.
"Esa cor amarela é única. Non coñezo en Europa unha cor natural coma esta. E despois o labor que ten. Eu loito cada día un pouco para que se recoñeza como patrimonio cultural, porque é a nosa escola. E sobre todo fai falta unha escola para que isto non morra. Só queda o meu fillo e ten corenta anos", advirte Vázquez.
