O Porriño enxalza o mel galego na feira apícola das Rías Baixas
O ácaro varroa, as velutinas, o cambio climático e a proliferación de meles de fóra de peor calidade están poñendo en risco o ouro doce galego
No Porriño esta fin de semana celebran a trixésimo oitava edición da Feira Apícola Rías Baixas, unha oportunidade non só para mercar mel senón para coñecer, da man de expertos e de experiencias didácticas, cales son as propiedades nutricionais e terapéuticas do ouro doce galego.
Do mesmo xeito, analízase o estado do sector apícola que, por varios factores, reduciu o ano pasado a súa produción á metade.
En feiras coma esta, a apícola Rías Baixas do Porriño, aprendemos do noso. Todo o mel que aquí se vende leva esta etiqueta de Indicación Xeográfica Protexida que indica que estamos ante un mel cen por cen galego.
"Teñen o garante, os consumidores, que o mel galego ten unha calidade diferenciada. Pedimos parámetros maiores que a norma de calidade do mel a nivel español, e está controlado desde a colmea ata o punto de venda, así que a nivel de calidade todos os meles etiquetados están ben", conta a TVG Ester Ordóñez, a veterinaria da Agrupación Apícola de Galicia.
En feiras coma esta aprendemos que o mel é un produto intimamente ligado ao territorio galego, ao chan granítico, ao clima atlántico, á floración maiormente silvestre. Un estudo avalado pola Universidade de Vigo expón que a calidade nutricional do mel galega é superior.
"Que o mel de Galicia comparado coas táboas nutricionais de mel que existen a nivel mundial e que están publicadas, ten máis vitaminas, máis minerais, e un nivel de antioxidantes a destacar e que se pode comparar incluso con froitas e verduras. Así que xa sabedes que é unha marabilla", explica Ester Ordóñez, a ceterinaria da Agrupación Apícola de Galicia.
E ademais de ser esta unha feira clásica con postos, con compra e venda, a feira do mel ofrece actividades didácticas. Desde clases de cociña, ata catas coma a deste serán nas que casamos mel e queixo.
"De toda a vida case toda a xente das aldeas tiña na súa casa queixo e mel. Porque todo se producía na casa. É un matrimonio perfecto porque equilibra moi ben algo moi doce, o mel, co queixiño que sempre tira a ácido, os queixos do país, tipo Tetilla, ou Arzua-Ulloa, e entón é un matrimonio marabilloso", relata André Arzúa, de Espazo Abella.
Pero a Feira Apícola das Rías Baixas, déixanos tamén datos e cifras da man da agrupación apícola de Galicia. 2024 volveu ser un mal ano de produción. O ácaro varroa, as velutinas, o cambio climático e a proliferación de meles de fóra de peor calidade están poñendo en risco o ouro doce galego.
