Investigado por circular a 183 km/h e dar positivo en drogas en Negreira
O condutor realizaba un adiantamento perigoso nunha zona expresamente prohibida por ser un cambio de rasante, poñendo en grave risco o resto de usuarios da vía
A Garda Civil tamén detivo a un home en Cedeira como presunto autor dun delito contra a saúde pública e cursou denuncias contra dúas persoas por presuntas infraccións na seguridade viaria
Garda Civil/Ministerio do Interior
O Sector de Tráfico da Garda Civil de Galicia investiga un home por circular a 183 km/h e dar positivo en drogas.
Os feitos ocorreron cando unha patrulla que se atopaba realizando un servizo de control de velocidade no km 9 da estrada AC-544, termo municipal de Negreira, detectou un turismo circulando a 183km/h, segundo informa o instituto armado.
Ademais, o condutor realizaba un adiantamento perigoso nunha zona con esa manobra expresamente prohibida por ser un cambio de rasante, xa que pon en grave risco o resto de usuarios da vía.
A Garda Civil procedeu á interceptación do vehículo, realizándolle ao seu condutor as probas de alcol e drogas, dando positivo na proba en cocaína, pendente da confirmación polo laboratorio.
Eses feitos tradúcense en dous delitos contra a seguridade viaria, ademais de estar pendente dun terceiro por conducir baixo os efectos de substancias estupefacientes.
O investigado, enfróntase a penas de prisión de 3 a 6 meses ou multa de 6 a 12 meses ou traballos en beneficio da comunidade por ir a máis de 80 km/h por vías interurbanas, ademais da privación do dereito de conducir vehículos de motor e ciclomotores por un período de un a catro anos, en caso de ser condenado.
O adiantamento en cambio de rasante sen visibilidade, recollido pola propia cámara do radar, implica a perda de catro puntos e 200 euros de multa.
O resultado positivo na proba de drogas carrexará a perda de 6 puntos e unha sanción de mil euros en caso de confirmación do resultado polo laboratorio.
Tamén en Cedeira
A Garda Civil detivo en Cedeira un home como presunto autor dun delito contra a saúde pública ao ser interceptado con droga mentres viaxaba nun vehículo, informou este venres ese corpo de seguridade.
Detiveron o turismo ao comprobar durante un servizo preventivo de seguridade cidadá que realizaba "manobras evasivas" tras observar a presenza da policía.
As respostas dos ocupantes carecían de coherencia, polo que se identificou tres persoas e atopouse, tras un "palpado superficial", pequenas doses dunha "substancia resinosa de cor marrón, supostamente haxix", ao condutor e a un dos seus acompañantes.
Mentres, o terceiro acompañante levaba consigo sete doses individuais, "supostamente de MDMA", cun peso de 3,51 gramos, ademais de cinco doses "supostamente de haxix" e dun peso de 8,99 gramos e 370 euros en metálico.
Substancias estupefacientes e diñeiro/Garda Civil/Ministerio do Interior
A Garda Civil detivo este home como presunto autor dun delito contra a saúde pública e levantou actas de denuncia contra o condutor e o outro home por presuntas infraccións á Lei de Protección da Seguridade Cidadá, ademais de incautar os efectos atopados.
