Un home xulgado por tentar matar outro en Ferrol nunha discusión por drogas acusa un terceiro

Un home acusado de tentativa de asasinato, en relación a uns feitos ocorridos nunha vivenda de Ferrol na madrugada do 29 de xuño de 2023, apuntou a un terceiro home que mantivo unha discusión coa vítima "por un diñeiro da droga". "Eu non sei nada dun disparo", declarou.

A Fiscalía pide 13 anos e 8 meses de cárcere para el por dous delitos, un de tentativa de asasinato e outro de tenza de armas sen licenza. Os feitos tiveron lugar en Ferrol no verán de 2023 e foi o Xulgado de Instrución Número 2 da cidade departamental o que deu traslado do sumario a esta sección segunda da audiencia coruñesa.

Acusado e vítima recoñeceron que consumían e o primeiro traficaba con droga habitualmente tamén. O día do suceso, tras unha discusión previa por cartos, nun momento dado o acusado presuntamente colleu unha pistola semiautomática e efectuou un disparo a un metro de distancia contra o seu examigo que estaba sentado no sofá da vivenda.

A pistola nunca apareceu. O acusado, que está en prisión provisional dende entón, nega os feitos, pero á vítima extraéronlle un proxectil do úmero e estivo máis de 2 meses con tratamento médico. A bala rozoulle o labio superior e fíxolle outra ferida no pescozo.

Non había testemuñas. Só algunha cámara de seguridade que os captou xuntos previamente nun caixeiro, taxistas que levaron o acusado esa noite e o propietario dunha armería que asegura que lle preguntou por balas axustadas a ese calibre, pero non as mercou xa que non tiña permiso. As análises de ADN e de balística non son de todo concluíntes.

A defensa pide a libre absolución do acusado por falta de probas contra el. O xuízo quedou visto para sentenza.