Desmantelan un narcopiso en Pontevedra no que vendían pipas con crack listas para o consumo
É a primeira vez que a policía atopa a cocaína preparada deste xeito en Pontevedra
O camelo ocupara o piso hai máis dun ano e vendía drogas de todo tipo, na vivenda e noutros puntos da cidade
Dáballe o traballo feito, as pipas xa impregnadas no crack, cocaína en forma de pedras ou cristais, que se fuma. É a primeira vez que aparece algo así en Pontevedra.
"Encontraron un tipo de droga diferente pola preparación. O individuo, coas rochas de crack, previamente cociñadas e cos vapores, impregnaban as pipas para telas listas e ser máis rápido o consumo", explica Paula Novas, voceira da Policía Nacional de Pontevedra.
Era o negocio perfecto, porque o crack ten uns efectos inmediatos, pero que duran pouco, de maneira que o cliente, o toxicómano, repite dose en pouco tempo. Quizais por iso o narcopiso era un ir e vir de xente constantemente.
"Vivían varios porque eses veñen en manda. Non imaxinas, vendo como se vendía droga. Aguantamos ruídos pola noite porque a distribución deles é pola noite. Polo día dormen e pola noite traballan"; comenta un veciño.
O camelo leva no piso máis dun ano, en pleno centro de Pontevedra. Entrou como amigo do propietario e fíxose coa vivenda, para pesadelo dos veciños.
"Este tipo de pisos recibe cantidade de xente allea ao edificio e isto xera moitos problemas na comunidade, tanto de seguridade aínda que sexa inseguridade subxectiva, pero tamén de molestias porque timbran nos portais, fan ruído, van a calquera hora do día e iso xera problemas de convivencia", remarca José Manuel González Abal, tenente xefe da Policía Local de Pontevedra.
Golpe importante no que colaboraron Policía Nacional e Local, porque o detido non é un traficante máis. Vendía neste edificio, pero tamén noutros puntos da cidade, drogas de todo tipo.
"Localizan diferentes útiles, doses de cocaína, crack, algo de marihuana, diferentes útiles para a preparación da droga, básculas e doce teléfonos móbiles roubados, que se utilizan para o intercambio de droga", engade a voceira da Policía Nacional.
O crack é unha droga pouco frecuente en Pontevedra, con gran poder de adicción e que provoca unha deterioración rápida.
