Á prisión un home que distribuía drogas en Ferrol e realizaba entregas a domicilio desprazándose en taxi

Un veciño do barrio do Inferniño, en Ferrol, foi enviado a prisión tras ser detido por axentes da Policía Nacional da Comisaría de Ferrol-Narón, acusado dun delito de tráfico de estupefacientes, que tamén distribuía a domicilio desprazándose en taxi.

A actuación levouse a cabo na denominada Operación Monasterio, iniciada no principio do ano, ao terse coñecemento a través de denuncias cidadás da existencia dun punto de venda de drogas na rúa Mosteiro de Monfero, próxima a centros educativos.

Ante as denuncias, membros do Grupo de Estupefacientes desta comisaría estableceron un dispositivo que confirmou a existencia deste narcopiso, ao que acudían diariamente gran número de persoas para adquirir doses de substancias estupefacientes. O investigado tamén realizaba entregas de droga a domicilio, desprazándose para iso en taxi.

Desta forma, o 21 de marzo realizouse un rexistro no que se procedeu á detención do seu morador ao localizar 40 gramos de cocaína, 2,5 gramos de heroína, 280 gramos de haxix, 1.600 gramos de marihuana, 5 gramos de MDMA e varios comprimidos e substancias de corte para adulterar a droga.

Tamén se lle interviñeron 1.650 euros en efectivo, dúas básculas de precisión para a pesada de substancias estupefaciente e dous machetes de grandes dimensións, colocados á beira da porta de acceso ao domicilio, como medida de seguridade.