A oposición únese en Francia nunha moción de censura conxunta contra o Goberno

Deputados da oposición uníronse este venres para presentar unha moción de censura contra o Goberno francés, como resposta á aprobación onte por parte do Executivo da reforma das pensións por decreto, sen o voto dos deputados.

A moción foi asinada por 91 deputados de varios partidos, anunciou o presidente do grupo parlamentario centrista e rexionalista LIOT, Bertrand Pancher.

"Fago un chamamento á responsabilidade de todos os deputados para protexer a democracia", sinalou Pancher en declaracións á prensa na sede da Asemblea, quen subliñou que hai "unha profunda crise política".

Os asinantes da moción aspiran a agrupar todas as voces desconformes coas políticas do Goberno, aínda que polo momento non suman suficientes apoios. 

A iniciativa partiu dun grupo que xunta deputados de centro e antigos aliados do presidente Emmanuel Macron, e xa recibiu o aval de cinco bloques, entre eles o que agrupa as formacións de esquerda.

O regulamento da Asemblea Nacional establece que hai que esperar polo menos 48 horas entre a presentación dunha moción de censura e o seu debate e votación, polo que -a falta dunha decisión da Mesa da cámara- como pronto se trataría a partir do domingo á tarde.

Fai falta unha maioría absoluta para derrubar o Goberno, o que supón reunir 289 votos, que nestes momentos son 287 debido a que hai varios escanos vacantes.

Outros partidos da oposición anunciaran onte a presentación das súas propias mocións de censura. De feito, pouco despois da formalización desta primeira moción, Agrupación Nacional, o partido de ultradereita de Marine Le Pen, presentou unha segunda, aínda que xa anunciara que votaría a favor porque o importante "é que o Goberno caia".