A Universidade de Santiago retoma as clases ás 15:00 e as de Vigo e Coruña farano o mércores
O comité de crise da USC agradece "a responsabilidade coa que se actuou" e pide comprensión ante posibles incidencias
A UDC atrasa a volta a clase polas dificultades na mobilidade e confirma que continúan traballando para reactivar os servizos informáticos
A UVigo informa de "normalidade" nas actividades investigadoras e administrativas e atrasa o acto de entrega do II Premio atlanTTic
Os campus da Universidade de Santiago de Compostela (USC) retomarán as clases este martes, a partir das 15:00 horas, tras volver o servizo eléctrico na gran maioría do territorio galego, mentres que nas de Vigo (UVigo) e A Coruña (UDC) a docencia se retomará este mércores.
A USC retoma a docencia a partir das 15 horas deste martes
A USC foi recuperando a normalidade ao longo da mañá, polo que todo o seu persoal deberá incorporarse. Se atopan algún tipo de incidencia ou dano derivados do corte da subministración, poderán avisar á Xerencia da universidade por correo electrónico.
Con todo, a actividade docente nos campus de Santiago e Lugo mantense suspendida ata as 15:00 co obxectivo de analizar as incidencias de acceso aos sistemas nas aulas. A partir desa hora, as clases desenvolveranse "ordinariamente".
O comité de crise da USC agradece "a colaboración de toda a comunidade universitaria" e a "responsabilidade coa que se actuou nestes momentos de incerteza, así como a comprensión coas incidencias que se poidan producir".
A UDC atrasa o inicio das clases ata o mércores
A UDC dixera inicialmente a docencia se podería retomar a partir das 15:00 horas. Con todo, a institución reuniu os seus departamentos na mañá deste martes e a decisión final foi atrasar a volta ás clases un día máis.
Nun comunicado, a universidade coruñesa confirma que os centros situados na cidade herculina e Ferrol retomarán a súa actividade completa o mércores logo de que este martes estea a traballarse para reactivar os servizos.
A UDC mantén suspendida a docencia "dadas as dificultades de mobilidade" por parte do alumnado e o persoal, ao atoparse suspendidos os servizos ferroviarios. As residencias universitarias mantiveron e manterán a súa actividade "en todo momento".
O principal problema da universidade foron as telecomunicacións, xa que non funcionaban as aplicacións informáticas nin a páxina web, sen que houbese ningunha incidencia relacionada coa seguridade.
O goberno da UDC agradece a comprensión de toda a súa comunidade e o labor do seu persoal técnico, que "leva traballando arreo nas últimas horas" para recuperar o servizo.
A UVigo volverá ás clases o mércores
En canto á UVigo, a decisión foi manter a suspensión das clases nos campus de Vigo, Ourense e Pontevedra durante toda a xornada deste martes, polo que os estudantes volverán ás facultades o mércores.
Iso si, as tarefas investigadoras e administrativas están a desenvolverse "con normalidade" en todos os centros. Tamén se manterá a actividade institucional, de tal modo que se celebrou o consello de campus de Ourense, programado para a partir das 9:30 horas.
Con todo, outros actos previstos para este martes atrasáronse, como a entrega do II Premio atlanTTic á mellor tese de doutoramento en tecnoloxías de telecomunicación.
A UVigo confirma que, ao longo das horas nas que se produciu o apagamento, "non se rexistraron incidencias nas dependencias da institución viguesa, nin nos seus sistemas eléctricos, nin de seguridade". O único problema, engade, afecta a rede informática, pero prevé que esta mañá quede resolto.
.png)
