Atopan o caxato da muller desaparecida en Boborás

Non se sabe canto tempo exactamente leva Emérita fóra da casa. Os seus familiares denunciaron a desaparición o martes, porque non lles collía o teléfono, pero foi o luns cando estiveron con ela por última vez.

Fabio Rosón González, tenente da Garda Civil do Carballiño: "A señora puido querer saír despexarse, ou algún recordo que tivera ela dalgunha aldea antiga, ou unha leira... non sabemos ben que rumbo puido tomar".

Unha trintena de persoas andan á súa procura. Ademais de voluntarios e axentes a pé, percorrendo o monte, a Garda Civil leva cans de rastrexo, un helicóptero e dous drons. Búscana polo monte entre Boborás e O Irixo, nas inmediacións da pista forestal onde apareceu o seu caxato.

"Zona de moitas árbores e bosque pechado que complica a busca, sobre todo cando chega a noite e buscan refuxio", explica o tenente Rosón, coordinador do operativo de busca.

Emérita, de 73 anos, está delicada de saúde. Ten párkinson e recibe a medicación mediante un dispositivo electrónico que funciona con batería. Os veciños cren que non puido ir moi lonxe.

"A zona, xa ves: todo unha maleza que non se encontra. O que pasa é que non sabemos cara a onde colleu, para arriba ou para abaixo". "Pónseme costa arriba que chegase ata aquí, porque non podía. Ela é nova e ten o sentido todo, pero o párkinson puido con ela", comentan dúas veciñas.

A muller reside habitualmente coa súa filla na Coruña, pero estaban aquí pasando as vacacións.

Un axente da garda civil opera un dron de busca