Bota a andar en Galicia a campaña estival de control das embarcacións de recreo

Co aumento da actividade no mar durante a época estival, a Garda Civil, a Capitanía Marítima da Coruña e a Delegación do Goberno puxeron en marcha un operativo de control de embarcacións deportivas, de recreo e motos náuticas ata o 15 de setembro.

O obxectivo principal desta campaña é concienciar tanto a profesionais como a afeccionados da importancia de seguir as normativas de seguridade para protexer a integridade das persoas, en especial, bañistas.

Controlaranse os certificados de navegabilidade, verificaranse os xustificantes de pago do seguro en vigor e revisarase a titulación náutica correspondente.

Tamén se inspeccionarán establecementos e negocios relacionados con estas actividades para asegurar o cumprimento das medidas de seguridade e evitar accidentes.

Campaña de 2023

Na campaña de 2023, inspeccionáronse máis de mil embarcacións de recreo no litoral galego, nas que se detectaron infraccións relacionadas principalmente con seguros obrigatorios e titulacións.

Tamén houbo denuncias por navegación nocturna, exceso de velocidade, falta ou caducidade de bengalas e chalecos salvavidas, exceso de ocupantes e falta de inspección técnica obrigatoria.

A campaña específica para motos náuticas busca minimizar accidentes e aumentar a seguridade en praias e zonas de navegación.

Recomendacións da Garda Civil

A Garda Civil lembra, nun comunicado, que nas zonas de baño balizadas está prohibida a navegación deportiva e de recreo, así como o uso de embarcacións a motor ou vela, agás se existe unha canle establecida para entrar ou saír.

Recomenda revisar as embarcacións antes de partir, sobre todo o nivel de carburante, o motor e os sistemas de seguridade e comunicación a bordo, ademais de consultar as condicións meteorolóxicas e evitar navegar en caso de mal tempo ou mala visibilidade.