Coudet en sala de prensa falou da importancia de afrontar o partido coa seriedade que merece e de respectar ao rival como dúas das chaves para superar a eliminatoria de mañá (20:00 horas) contra o Atlético Baleares. 

"Son un equipo de coidado, xogan ben e están ben clasificados na súa categoría".

Sobre posibles rotacións no partido de mañá, tendo en conta que o Celta xoga de novo o sábado ás 16:15 contra a Real Sociedade, Eduardo Coudet non desvelou as súas bazas para o once de mañá:

"Mañá decidirémolo, non pasaron nin 48 horas", comentou. O que si quixo deixar claro é que xogue quen xogue a importancia do partido non cambia en absolutamente nada.

O futuro de Okay Yokuslu no Celta

 

Máis alá do partido de Copa do Rei, a Coudet preguntáronlle polos rumores que situán a Okay lonxe do Celta neste mercado invernal, sobre todo despois do seu partido contra o Betis logo dun ano sen xogar.

O 'Chacho' recoñece que fai 6 meses, na pretempada, o turco estaba fóra do Celta, pero que ao final non marchou. Mentres estea a súa disposición o técnico asegura que van aproveitar as súas aptitudes e que fixo un gran partido.