Dimite Justin Trudeau, primeiro ministro do Canadá
Dimite Justin Trudeau, primeiro ministro do Canadá
Renuncia tras máis de nove anos no cargo porque "non é a mellor opción" para as próximas eleccións previstas para outubro
O Parlamento permanecerá pechado ata o 24 marzo o que evitará que a oposición presente unha moción de censura e permitirá ao Partido Liberal elixir un substituto
Reuters
O primeiro ministro do Canadá, Justin Trudeau, anunciou este luns a súa dimisión nunha conferencia de prensa tras permanecer máis de 9 anos no poder.
"Teño a intención de dimitir como líder do partido e como primeiro ministro despois de que o partido seleccione o seu próximo líder mediante un proceso competitivo e rigoroso a nivel nacional", manifestou Trudeau.
O primeiro ministro explicou que, aínda que é un "loitador", chegou á conclusión de que non é a "mellor opción" para as próximas eleccións, previstas para outubro, e que, por iso, decidiu botarse a un lado.
"Durante as festas, tiven tamén a oportunidade de reflexionar e mantiven longas conversacións coa miña familia sobre o meu futuro", explicou para engadir: "Onte pola noite, durante a cea, comuniquei aos meus fillos a miña decisión".
A decisión supón que Trudeau manterase de forma provisional como primeiro ministro do Canadá ata que os liberais atopen un substituto.
"O Partido Liberal do Canadá é unha institución importante na historia do noso gran país e a nosa democracia. Un novo primeiro ministro e líder do partido manterá as ideas e os valores do Partido Liberal", explicou.
Trudeau tamén informou de que o Parlamento canadense permanecerá pechado ata o 24 de marzo, o que evitará que os partidos da oposición poidan presentar de forma inmediata a anunciada moción de censura contra o Goberno.
O líder canadense xustificou a controvertida decisión, que foi aprobada pola gobernadora xeral do país, Mary Simon, que actúa como xefa de Estado en representación do monarca inglés, de prorrogar o Parlamento pola "parálise" da Cámara Baixa.
"Por iso, esta mañá aconsellei á gobernadora xeral que necesitamos unha nova sesión do Parlamento. Autorizou a petición e a Cámara Baixa será prorrogada ata o 24 de marzo", detallou.
O Parlamento canadense tiña previsto renovar as súas sesións o próximo 27 de xaneiro, tras as vacacións do Nadal. Os partidos da oposición, que teñen a maioría no Parlamento, anunciaran que presentarían unha moción de censura contra Trudeau tan pronto como se renovasen as sesións da Cámara Baixa.
A prórroga, que de forma efectiva cesa todas as actividades lexislativas, é un controvertido mecanismo que foi utilizado por última vez en 2020 cando Trudeau se enfrontaba a un grave escándalo sobre os contratos gobernamentais cunha ONG.
En decembro de 2008, o entón primeiro ministro, o conservador Stephen Harper, tamén prorrogou o Parlamento para evitar unha moción de censura que provocaría a caída do seu Goberno.
