Pelicot confesa: "Son un violador, como o resto de acusados, que sabían todo"

Dominique Pelicot recoñeceu este martes no xuízo en Aviñón no que está acusado de drogar a súa muller durante case dez anos para ofrecela a decenas de homes que tamén abusaban sexualmente dela, que é un violador, como o resto de acusados.

"Son un violador, como todos os acusados nesta sala, que ao vir coñecían o seu estado", afirmou en referencia ao feito de que os outros homes sabían que a súa muller, Gisèle Pelicot, atopábase en estado de inconsciencia por mor dos ansiolíticos que lle daba.

Despois de comezar a súa declaración entre choros, cando lembrou os abusos sexuais que sostén sufrir cando tiña 9 anos e a violación que presenciou aos 14, recoñeceu os feitos que se lle imputan "na súa totalidade".

"Non merecía isto", subliñou en referencia á súa exmuller (o divorcio formalizouse en agosto), despois de insistir en que os outros 50 homes que sentan no banco xunto a el estaban ao corrente dos seus procedementos e "non poden dicir o contrario".

Algúns deses acusados afirman que non sabían que Gisèle Pelicot estaba inconsciente, baixo os efectos dos ansiolíticos, cando tiñan relacións sexuais con ela, e pensaban que todo formaba parte das fantasías sexuais que compartía a parella, e que polo tanto había consentimento dos dous.

Ela afirmou, pola súa banda, nunha reacción a esta primeira declaración de Dominique Pelicot, que nos 50 anos que viviu co seu marido non puido imaxinarse que a violase, que non dubidou del "nin un só segundo", e que tiña confianza.

"Durante 50 anos vivín cun home do que non imaxinaba que puidese cometer estes actos de violación. El é consciente deses actos de violación, pero eu non dubidei deste home nin un só segundo. Tiña plena confianza nel".

Engadiu, ademais, que "durante 50 anos amei a este home, a pesar dalgunhas fases", e que tiña tal confianza nel que lle poderían cortar as dúas mans por crer o que lle dicía.

O principal acusado sinalou que aínda que "nunca considerei a miña muller como un obxecto, desgraciadamente os vídeos mostran o contrario".

Tras ser detido en setembro de 2020 por gravar baixo as saias unhas mulleres nun supermercado da cidade de Carpentras, os investigadores que fixeron un rexistro na súa casa atoparon nun disco duro centos de vídeos e fotos que el tomara durante as sesións de abusos sexuais da súa muller drogada ás que convidou a decenas de homes.

Eses vídeos e esas fotos son os que permitiron identificar algo máis de medio centenar de homes, dos cales 49 están a ser xulgados neste proceso que comezou o 2 de setembro, e no que cada un deles podería ser condenado a 20 anos de cárcere por violación agravada.

Dominique Pelicot lembrou que "grazas a eses vídeos púidose dar con quen participou" e lanzou entón unha mirada aos outros acusados. Sinalou que os gardaba, precisamente, para ter un rexistro deses participantes, polo pracer de contemplalos e por "vicio".

Dominique Pelicot fixo entre saloucos esta primeira declaración, que se pospuxo desde hai unha semana pola súa enfermidade, e que conducira á suspensión das sesións do xuízo o pasado venres e onte, luns.

Un equipo de dous médicos que o examinou a petición do presidente do Tribunal do Criminal de Vaucluse, Roger Arata, ditaminou que o principal acusado estaba en condicións de acudir ao xuízo hoxe, pero cunha serie de adaptacións. Por unha banda, con pausas de 15 a 20 minutos cada 90 minutos de declaración, e por outra cun asento adaptado, en particular cun coxín.

Segundo a súa avogada, Béatrice Zavarro, ao principal acusado atopóuselle unha pedra na vexiga e sofre unha infección renal. 

Pelicot salientou que tiña "A familia ideal, pero eu non o era". "Arruneino todo e pedino todo. Teño que pagar", concluiu,