Gabriel Marcelli queda segundo no Nacional de Arteixo e céntrase no Mundial de Benahavís

A diferenza entre Jaime Busto e Gabriel Marcelli, e os demais competidores do Campionato de España de trial é tanta que a segunda cita do Nacional, que se disputou en Arteixo esta fin de semana ante uns tres mil espectadores, converteuse nun man a man entre ambos os pilotos, máis centrados no inicio do Campionato do Mundo de trial GP, a próxima fin de semana en Benahavís (Málaga), con Toni Bou como rival a bater.

Se o sábado, a pugna estivo parella, cun Marcelli que foi de menos a máis, onte Busto afianzouse na primeira posición, despois de que o galego optase por arriscar para levar o triunfo e houbese algunhas zonas do percorrido que se lle atragoaron.

A proba organizada polo Motoclub Motomontañismo Arteixo é unha das que gozan de maior prestixio no calendario desta modalidade deportiva. A zona indoor, situada no espazo denominado A Cúpula, rexistrou un cheo total.

A localidade arteixá xa acolleu citas mundialistas e ao club anfitrión tamén se lle acaba de conceder a organización do Trial das Nacións do ano 2026, que se celebrará no mes de setembro como colofón ao calendario do Mundial de trial GP.