Faraldo chama á participación "para que o cambio en Galicia sexa posible"

A candidata de Podemos á Presidencia da Xunta, Isabel Faraldo, asegurou este domingo que o "auténtico valor" do seu partido é "a valentía e a transformación" que cre que demostrou na campaña electoral e vería un éxito se logra botar ao PP da Xunta.

Tras votar na Coruña, Faraldo cualificou a xornada como un deses "días fermosos da democracia nos que a cidadanía sae a pronunciarse", polo que agradeceu o esforzo "a todas as persoas que fan posible estes procesos electorais".

Recoñeceu que está "nerviosa" e con "a emoción dunha campaña moi intensa, moi bonita e moi emocionante" na que Podemos puxo todo da súa parte "nun escenario moi, moi difícil".

"Dixemos esas cousas que ninguén se atreve a pedir. Ese é o auténtico valor de Podemos, esa valentía e esa transformación", dixo tras unha campaña na que os afiliados do seu partido decidiron non compartir lista con Sumar e ningunha enquisa lles deu posibilidades de entrar no Parlamento de Galicia.

Faraldo espera unha "participación ampla" e, por tanto, sostén que "o cambio en Galicia é posible", o que implicaría acabar coa maioría absoluta do Partido Popular-

"Se se reverten as políticas do PP expulsando ao PP do Goberno, ímolo celebrar", dixo e engadiu que habería máis celebración se ademais Podemos lograse ser decisivo.