Tellado di que Sánchez está na China dentro dunha "fuxida permanente" e pide eleccións

O voceiro do PP no Congreso, Miguel Tellado, di que Sánchez está na China nunha "fuxida permanente" do que ocorre no Estado español e volve pedir a convocatoria urxente de eleccións. 

Nun acto no Burgo (Culleredo, A Coruña), Tellado cualificou o momento actual como "tremendamente complexo" e dixo que a viaxe á China de Sánchez foi para "poñer quilómetros polo medio para evitar a grave situación política".

"Nesta mesma semana, mentres Sánchez visitaba Vietnam e a China, a UCO -Unidade Central Operativa da Garda Civil- certificaba nun informe as manobras de Begoña Gómez e do ministro de Transportes, do señor José Luis Ábalos, para conseguir o rescate de Air Europa. Esta mesma semana coñeciamos as lamentables peripecias do ministro de Fomento (Ábalos) nun parador en Teruel con furgonetas de prostitutas que viaxaban desde Valencia para unha xornada festiva", engadiu.

Para o portavoz do PP, o Goberno "desde o minuto cero dedicouse á corrupción" e acusou á ministra portavoz, Pilar Alegría, de chegar ao cargo "non polo ben que fala, senón polo moito que cala", pois sitúaa nese parador de Teruel.

"A corrupción cerca de preto o Goberno de Pedro Sánchez. Sánchez está escapado. Sánchez está en fuxida permanente. E España e a nosa democracia non merece isto. E nós pedímoslle a Sánchez que aterre, que dea explicacións e que lles devolva aos españois a palabra", continuou.

Na súa opinión, esa hipotética convocatoria electoral será para decidir entre "un goberno indigno" ou "pechar esta lamentable etapa" para contar "cun goberno honesto, honrado e que sexa de fiar".

"No peor momento temos o peor goberno. No momento no que España se enfronta a unha guerra arancelaria que sacode a todo o mundo. Nun momento en que en Europa se nos esixe aos estados membros o rearmamento das nosas armadas, o rearmamento da nosa seguridade nacional e da nosa defensa, temos o peor goberno posible", sostivo.

O Partido Popular continuará coa oposición mentres tanto, o que supón "pedirlle ao Goberno que renda contas no Congreso, que renda contas publicamente sobre todo o que está a suceder e que adopte as medidas necesarias para que España afronte da mellor forma posible os retos inmediatos que están encima da mesa".

"Temos un goberno que evidencia cada día a súa propia debilidade interna e desde logo nós cremos que España necesita e merece algo mellor e que ese algo mellor non pode vir da man do Partido Socialista de Pedro Sánchez", concluíu. EFE