Israel bombardea Beirut e Hezbollah responde lanzando unha vintena de proxectís

Israel bombardeou a madrugada deste venres diversos obxectivos nos suburbios meridionais de Beirut, onde a intensidade dos ataques derrubou varios edificios e onde a prensa hebrea asegura que foi atacado o candidato a líder do grupo xiíta Hezbollah Hashim Safi Al Din.

A forte onda de bombardeos provocaron o derrubo dunha comisaría de policía, un supermercado e outros inmobles no arrabalde da capital do Dahye, un importante bastión de Hezbollah, informou a Axencia Nacional de Noticias do Líbano.

Segundo o medio estatal, a aviación israelí utilizou durante a campaña bombas sen carga e antibúnker e tamén alcanzou outros puntos das aforas de Beirut fóra do Dahye. Pola súa banda, o diario The Times of Israel asegurou que un dos obxectivos era o clérigo Hashim Safi Al Din, probable sucesor do máximo líder de  Hezbollah, Hassan Nasrallah, morto hai unha semana nun bombardeo israelí contra unha sede subterránea da formación nos mesmos suburbios.

Segundo o xornal israelí Haaretz, entre os obxectivos dos ataques desta madrugada estivo de novo un búnker de Hezbollah utilizado por altos funcionarios. Israel e  Hezbollah levan enfrontados desde o inicio da guerra na Franxa de Gaza en outubro de 2023, pero a violencia aumentou a un nivel sen precedentes hai uns dez días, cando as forzas israelís iniciaron unha campaña de bombardeos masiva que arrasou localidades e vilas enteiras.

Neste contexto, desde hai unha semana, o Dahye é obxectivo de intensas ondas de ataques aéreos practicamente a diario. Desde o comezo das hostilidades, os ataques de Israel mataron case 2.000 persoas e obrigaron a 1,2 millóns a abandonar os seus fogares, principalmente no sur e o leste do país mediterráneo.

Proxectís lanzados dende o Líbano ao norte de Israel

Uns vinte foguetes foron lanzados este venres desde o Líbano contra o norte de Israel, a maioría dos cales foron interceptados, afirmaron as Forzas de Defensa Israelís nun comunicado sen informar de vítimas.

Tras activar as sirenas antiaéreas na zona de Haifa, no norte de Israel, "detectáronse unha vintena de lanzamentos que atravesaron o territorio do Líbano. A maioría dos lanzamentos foron interceptados pola Forza Aérea, o resto caeu nunha área aberta", indicaron as IDF.

As Forzas de Defensa Israelís tamén sinalaron que "múltiples proxectís" foron disparados desde o Líbano contra a zona de Alta Galilea, a maioría tamén interceptados. Pola súa banda, o diario libanés Al Mayadeen informou dos disparos de foguetes desde o Líbano "coincidindo cun enxame de drons que penetraron no espazo aéreo de Galilea Occidental".

O exército israelí continuou bombardeando nas últimas 24 horas obxectivos da milicia xiíta Hezbollah en Beirut, incluído o seu centro histórico, por segunda vez nun ano de enfrontamentos.