Iván Ares volve con ilusións renovadas para pelexar polo Supercampionato de Rallys

Iván Ares volve con ilusións renovadas ao Supercampionato de Rallys. Despois dun ano moi complicado en 2024 no que mesmo deixou a competición durante varias probas por non estar mentalmente preparado, para este 2025 atopou a motivación no cambio de coche. Cambia Hyundai, co que estivo as últimas oito temporadas, por Toyota. Tamén cambia de copiloto e contará ao seu carón con Borja Rozada que acaba de proclamarse campión do Supercampionato acompañando a Alejandro Cachón. 

Ares estará entre os favoritos para facerse co título desta temporada. Cohete Suárez ou o ourensán Javier Pardo serán os seus dous grandes rivais logo da marcha de Cachón buscando retos de maior entidade. O piloto de Cambre tamén asegurou na presentación da súa nova montura que estará presente en varias probas do campionato galego.