Macron descarta nomear un primeiro ministro da coalición de esquerdas e abre unha nova rolda de consultas

O presidente francés, Emmanuel Macron, descartou este luns nomear un primeiro ministro da coalición de esquerdas Novo Fronte Popular (NFP), a pesar de ser a forza que obtivo máis deputados nas últimas eleccións lexislativas, tras constatar que non sobreviviría a mocións de censura doutros grupos.

"O presidente da República constatou que un goberno baseado unicamente no programa e os partidos propostos pola alianza con máis deputados, a Nova Fronte Popular, sería inmediatamente censurado por todos os demais grupos representados na Asemblea Nacional", indicou o Elíseo nun comunicado, ao concluír a rolda de consultas entre Macron e os bloques políticos.

"A estabilidade institucional do noso país aconsella que non se adopte esta opción", alegou a Presidencia, que abre desde este martes un novo ciclo de consultas con "responsables de partidos e personalidades que se distinguen pola experiencia ao servizo do Estado".

A mensaxe detalla que o NFP "non propuxo camiños para cooperar coas outras forzas políticas".

"Correspóndelles facelo", subliñou o Elíseo sobre a alianza que compoñen o Partido Socialista (PS), os comunistas, os ecoloxistas e o máis radical A Francia Insubmisa (LFI).

As fontes precisaron que outros partidos, como os bloques que integran o macronismo, si esbozaron "vías de coalición e de traballo común posibles entre diferentes sensibilidades políticas".

Eses partidos "móstranse abertos a apoiar un goberno dirixido por unha personalidade que non saia das súas filas", aseverou a Presidencia.

Neste complicado contexto, Macron chamou "a todos os dirixentes políticos para que estean á altura das circunstancias demostrando un espírito de responsabilidade".

"A miña responsabilidade é garantir que o país non se bloquee nin se debilite. Os partidos políticos gobernantes non deben esquecer as circunstancias excepcionais da elección dos seus deputados na segunda volta das eleccións lexislativas. Este voto obrígaos", indicou o presidente francés na mensaxe.

Xa antes do anuncio da Presidencia, o NFP advertira nun comunicado de que só volverían reunirse con Macron para falar dos detalles dun goberno de cohabitación liderado por Castets.

Pero os 193 escanos que suma o NFP onda os seus socios están moi lonxe da maioría absoluta de 289 que permitiría á coalición gobernar en solitario, sen a ameaza de que unha moción de censura tombe o correspondente Executivo.