Marco Rubio di que Hamas debe ser "eliminado" tras entrevistarse con Netanyahu
Rubio viaxou a Israel e decontado vaise entrevistar en Arabia Saudita con representantes rusos para analizar a paz en Ucraína
En paralelo, Macron convoca en París os líderes europeos este luns co obxectivo de buscar solucións ao conflito ucraíno
O secretario de Estado dos Estados Unidos, Marco Rubio, iniciou este domingo unha xira por Oriente Próximo e escolleu como simbólica primeira parada Israel para entrevistarse con Benjamin Netanyahu. Como pano de fondo está o rexeitamento dos líderes árabes á proposta de Donald Trump de trasladar a poboación palestina de Gaza.
Marco Rubio manifestou literalmente que Hamas debe ser eliminada e erradicada porque con eles a paz é imposible. Ademais, sinalou que Irán é a principal forza de desestabilización na rexión. Rubio apoia as posibles represalias de Israel contra Hamas por non liberar esta fin de semana todos os reféns israelís como reclamaba Trump baixo a ameaza de desatar o inferno.
Marco Rubio dirixirase deseguido a Arabia Saudita e alí vaise reunir con altos representantes de Rusia para tratar a paz en Ucraína.
Precisamente, o presidente francés, Emmanuel Macron, adquire hoxe protagonismo, coincidindo co remate da conferencia de seguridade de Múnic. Macron convoca os líderes europeos para tratar este luns en París posibles solucións para o conflito ucraíno.
O obxectivo é que Trump non se precipite nas negociacións con Rusia e que a Unión Europea teña un protagonismo nas conversas de paz, que o mandatario norteamericano parece obviar. En medios estadounidenses sinálase este domingo que Trump condicionou calquera axuda militar a Ucraína á obtención dos 50 % dos minerais das terras raras deste país. Segundo o Finacial Times, Zelenski rexeitou esa oferta esta mesma fin de semana.
