Rueda pide un "papel protagonista" para as comunidades autónomas na xestión dos fondos europeos

O presidente da Xunta Alfonso Rueda reclama en Bruxelas un "papel protagonista" para as comunidades autónomas na xestión dos fondos europeos. Tras ser elixido este xoves vicepresidente do Comité das Rexións, o xefe do Goberno galego defendeu no Parlamento Europeo a postura de España sobre os fondos de cohesión.

Alfonso Rueda entregoulle ao vicepresidente para a Cohesión e Reformas da Comisión Europea, Raffaele Fitto, un documento coa demanda común de todas as comunidades autónomas para que os fondos de cohesión se sigan xestionando de forma descentralizada e non como se fixo cos fondos de recuperación. Argumentan que é a maneira "máis eficaz de garantir que as prioridades dos cidadáns teñan o seu reflexo na política comunitaria".

O presidente da Xunta aproveitou a viaxe a Bruxelas para trasladarlle á vicepresidenta para a Transición Limpa, Xusta e Competitiva da Comisión, Teresa Ribera, a preocupación sobre a paralización dos parques eólicos, pendente dun pronunciamento da xustiza europea. Rueda defendeu que Galicia debe estar conectada ás grandes redes enerxéticas e de transporte de Europa e aseguroulle que todos os proxectos industriais cumprirán a normativa medioambiental.

"Transmitir esa visión de Galicia como lugar estratéxico e como unha administración que tramita con absoluta rigorosidade todos os procedementos ambientais, sobre todo dos proxectos que despois chegan a Europa para pedir axudas", dixo.

O xefe do Goberno galego tamén mantivo un encontro co comisario de Pesca e Océanos, Costas Kadis, ao que lle trasladou a petición de que non se eliminen as bonificacións ao diésel dos barcos e co que falou do impacto que poden ter os acordos de libre comercio con Tailandia, especialmente para o atún. "É imprescindible esixir as mesmas regras de xogo para todos", remarcou.