Uns 175.000 sirios regresaron ao seu país desde Turquía tras caída Al Asad en decembro

Uns 175.000 sirios regresaron ao seu país desde a caída do regimen de Bachar Al Asad en decembro pasado, cunha media de 40.000 retornos mensuais, informou o ministro do Interior turco, Ali Yerlikaya.

"Desde o 9 de decembro ata o de agora, 175.512 sirios regresaron ao seu país de forma voluntaria, segura, honorable e ordenada", indicou na rede X o ministro Yerlikaya. O ministro apuntou que este número, actualizado a data do pasado 13 de abril, corresponde a 33.730 familias. Xa desde 2017 estableceuse un programa de retorno voluntario, facilitando o transporte gratuíto a familias sirias que quixesen retornar ao seu país, pero a media oscilaba entre os 3.000 e os 14.000 ao mes, sumando un total de 915.000 en sete anos.

O número disparouse tras a caída do réxime para alcanzar os 39.770 mensuais desde inicios do ano en curso, segundo os gráficos difundidos por Yerlikaya. A gran maioría abandonaron Turquía a través dos pasos fronteirizos de Çilvegözü na provincia de Hatay e de Öncüpinar na de Kilis, ambos situados a menos de 50 quilómetros da cidade siria de Alepo, da que procede unha importante parte dos refuxiados sirios en Turquía.

Actualmente quedan 2,7 millóns de sirios con status de "protección temporal" en Turquía, segundo os datos do Ministerio. Estes cidadáns sirios están relativamente integrados na sociedade turca, xa que os campamentos establecidos ao principio da chegada de refuxiados, debido ao comezo da guerra civil en 2011, fóronse disolvendo, cos seus habitantes alugando vivendas e buscando traballo en diferentes cidades do país. Os refuxiados sirios teñen acceso gratuíto ao sistema de hospitais turcos e os seus fillos escolarízanse nos colexios públicos.