Miguel Ángel Rodríguez admite que difundiu aos medios un correo do mozo de Ayuso

Miguel Ángel Rodríguez, xefe de gabinete de Isabel Díaz Ayuso, admitiu que difundiu un correo entre o avogado da parella da presidenta madrileña e o fiscal que o investigaba por fraude fiscal.

Rodríguez, que chegou ao Tribunal Supremo as 09:40 horas rodeado dunha grande expectación, estivo declarando por espazo duns 45 minutos pola causa que se segue contra o fiscal xeral do Estado, Alvaro García Ortíz. A súa saída ante os medios de comunicación recoñeceu que fora el quen que difundira un correo (do 12 de marzo) entre a defensa do mozo da presidenta madrileña e a Fiscalía.

Esa mensaxe, no momento de ser difundida, daba a entender que a Fiscalía ofrecía un pacto ao avogado de González Amador. O correo do fiscal Julián Salto anúncialle á defensa de Alberto González Amador que van presentar unha denuncia e que hai posibilidade de pacto. "Ese é o texto que eu difundo", afirmou Miguel Ángel Rodríguez, sen precisar de onde obtivo ese correo electrónico.

Non obstante, ese correo era a resposta a outro anterior (do 2 de febreiro) no que o avogado da parella de Ayuso quen ofrecía a posibilidade dun acordo para que o seu defendido lograse unha condena menor se se declaraba culpable por defraudar máis 350.000 euros dos beneficios obtidos pola venda de máscaras en pandemia.

Sobre este primeiro correo, Miguel Ángel Rodríguez dixo descoñecer a súa existencia.

O xefe de gabinente de Díaz Ayuso tamén dixo á súa saída do Alto Tribunal que Álvaro García Ortiz "debe ser condenado de maneira exemplar", e apuntou ao presidente do Goberno, Pedro Sánchez, como responsable máximo dunha operación política contra a presidenta da Comunidade de Madrid.

Sinalou que é "evidente" que se González Amador non fose o noivo de Ayuso, "había tempo que este asunto sería resolvido por Facenda, como miles de casos diarios".

Por iso, acusou o presidente do Goberno, Pedro Sánchez, de "deseñar" unha "operación política" para "atacar" a Ayuso e augurou que "iso é o que o vai levar tamén a el ao xulgado".

O xefe de Gabinete de Ayuso compareceu a pedimento da Avogacía do Estado, que exerce a defensa do fiscal xeral, e ve "indicios" de que accedeu "a unha parte do contido dos correos" que o avogado de González Amador cruzou coa Fiscalía para recoñecer unha fraude a Facenda e tratar de chegar a un pacto.

A Avogacía sostén que "a primeira revelación de segredos foi de Miguel Ángel Rodríguez" o pasado 13 de marzo, para o que se basea en varias noticias en distintos medios publicadas aquela noite.

Rodríguez chegou a escribir en X: "Resumo da tolemia de hoxe: a fiscalía ofrece por correo electrónico un acordo ao sr. González antes de que poida responder, a mesma Fiscalía di que recibiu ordes 'de arriba' para que non haxa acordo e, entón, vaian a xuízo".

Por outra banda, dixo que non ten aínda a denuncia que este martes presentou o PSOE contra el nos xulgados de Madrid por haber presuntamente filtrado nun chat datos persoais de dous xornalistas obtidos por un policía que lles pediu identificarse mentres realizaban unha investigación sobre a vivenda de Ayuso e a súa parella.

Con todo, asegurou que "é ridículo que eu pregunte a un policía como se chaman dous xornalistas que non só coñezo, é que están a asinar todos os días no xornal co seu nome".

O PSOE culpa o asesor de Ayuso de filtrar "unha mentira". Aínda así, Óscar López, ministro para a Transformación Dixital, considera que "se se investigasen todas as filtracións que hai no país, non darían abasto os tribunais". 

Os socialistas cren, como Podemos, que se intenta desviar a atención do caso por presunta fraude fiscal. Para Isa Serra, voceira dos morados, Miguel Ángel Rodríguez deu hoxe un "bochornoso espectáculo en alianza cos xuíces do Supremo".

O xuíz do Supremo que leva o caso pediulle á Garda Civil que recupere información borrada nos teléfonos de García Ortiz. Elías Bendodo, vicesecretario de Coordinación Autonómica e Local do PP pregúntase "que había no teléfono do fiscal xeral do Estado para que tivera que dar o cambiazo".