Nova decepción do Deportivo, cun empate en Majadahonda
Tivo moitas ocasións no segundo tempo, pero non deu marcado ningún gol (0-0)
O Deportivo volveu amosar os problemas cara á porta contraria e empatou sen goles ante un Raio Majadahonda que só sumara un punto nas primeiras seis xornadas.
Preocupante foi a imaxe do equipo no primeiro tempo, en que apenas xerou oportunidades. De feito, a mellor ocasión estivo nas botas de David Rodríguez e salvouna o debutante Edu Sousa.
Na segunda parte si se viu un Deportivo ambicioso. Meteu na súa área o rival e comezou a xerar ocasións. Zalazar atopou o pau, Soriano quedou ás portas do gol e a entrada de Yeremay deulle outro pulo á dianteira. O canario tamén tivo a súa, moi clara, e para pechar a serie de ocasións no engadido Gorka Santamaría cabeceou lixeiramente desviado.
O Deportivo leva só unha vitoria nos últimos cinco partidos, fronte ao pechacancelas Talavera, e ve como os equipos da zona alta comezan a afastarse.
