O auxe dos 'outlets', un modelo de venda con produtos de marca a prezos reducidos

"A min paréceme estupendo a idea de ter roupa de boa calidade, de marcas de calidade a un prezo máis económico", comenta unha clienta

O modelo outlet está vivindo un dos seus mellores momentos. Funciona como centro comercial aberto e Allariz é o mellor exemplo que temos en Galicia, pero tamén como revulsivo para reflotar espazos comerciais que non pasaban polo seu mellor momento. Área Central, en Santiago, é un deles. A día de hoxe a ocupación é do 95 %.

"Nós levamos dous anos que estamos todo o tempo para arriba. Son todo boas novas, cada apertura de local que ocorre en Área Central supón un aumento de visitantes", apunta Sara Castedo, xerente de Área Central.

A crecente demanda nótase tamén no The Style Outlets da Coruña, que pechou o 2024 cun 98 % de ocupación

"A verdade é que o 2024 deixou uns resultados excelentes en toda España. Superamos os dous díxitos tanto en afluencias como en vendas en todos os nosos centros en España e neste en que nos atopamos no Coruña The Style Outlet chegamos aos dous díxitos de crecemento tamén co cal o estado de saúde dos nosos centro é excelente e os resultados do 2024 así o referendan", explica Óscar Mota, director de xestión The Style Outlets España

Os outlets ofrecen unha experiencia de compra diferente e funcionan como auténticas locomotoras nos centros comerciais.

 "Todos nos axudamos e é un reclamo e cada vez están entrando máis marcas moi coñecidas e con este modelo outlet que ao final é o que tira deste centro comercial, o modelo de descontos e de prezos moi atractivos", comenta Laura Iglesias, encargada de Lolita Multimarca en Santiago

A fórmula outlet naceu no téxtil. Agora podemos atopala en case todos os sectores comerciais.