O café máis antigo de Barreiros, o Moderno, vai camiño do século de historia
Tres xeracións de hostaleiros estiveron xa á fronte do local, no centro de San Cosme, e podería haber unha cuarta e mesmo unha quinta
Aberto en 1934, en plena Segunda República, o Café Moderno foi sempre un local de referencia no centro de Barreiros. Debe o seu nome á máquina coa que facían os cafés, que daquela era unha novidade, como tamén o era a radio que durante a ditadura franquista lles servía aos clientes para escoitar a Pirenaica.
"Hoxe en cada sitio hai unha televisión. Naquela época había unha radio, do ano 34, na cal se escoitaba a Pirenaica e todos os avatares da vida. Temos tamén un muíño, que está no comedor, co que se moía o café", explica o hostaleiro Xesús Seivane.
Ateigado de libros e de obras de arte, o Café Moderno é hoxe toda unha institución local. Ademais, vai xa pola terceira xeración de hostaleiros da mesma familia, e podería estenderse mesmo ata a quinta.
"É unha herdanza dos nosos avós e dos nosos pais, e un orgullo. Meus pais, María e Pancho, herdaron de Albina e de Antonio. Nós temos un fillo, Francisco, e xa hai un netiño, que é a quinta xeración", conta Xesús.
O Moderno permanecerá aberto como mínimo ata o ano 2032, cando prevé xubilarse o actual propietario.
Interior do Café Moderno, cheo de libros, fotos, cadros e esculturas
.png)