O Celta perde co Sevilla e non carbura fóra da casa (1-0)

O Celta caeu ante o Sevilla por 1-0 nun partido no que puido merecer máis e que segue alongando a súa mala serie fóra da casa. Os galegos comezaron ben o partido e a defensa adiantada dos de García Pimienta permitiulles facer dano nos primeiros intres. Pablo Durán sería o que gozaría de máis oportunidades, pero non conseguiría transformar ningunha en gol. A máis clara tívoa nun saque de córner, que cabeceou directamente ao pau da portería de Álvaro Fernández. O Celta continuou dominando con claridade a primeira metade e esta vez sería Aspas o que forzaría ao gardameta sevillista a voar para deter un bo disparo do galego. Deste xeito, o encontro marcharía con táboas ao descanso e cos de Giráldez merecendo máis.

Na segunda metade, o Sevilla daríalle a volta ás sensacións mostradas ata agora e adiantaríase grazas a un zurdazo dende fóra da área de Manu Bueno que tocaría en Fran Beltrán, despistando a Guaita e facendo que o balón acabara no fondo das redes. Poucos minutos despois, o partido tería unha tregua para homenaxear a Jesús Navas no seu último partido no Sánchez Pizjuán. Nos minutos finais, Bamba anotaría o empate para os celtistas despois de empurrar un rexeitamento de Álvaro Fernández, pero atopábase en posición ilegal. Dodi Lukébakio estivo a piques de pechar o partido nun contragolpe, pero enviou o disparo ao lateral da rede. Finalmente, o Celta deixaría escapar un partido que comezou dominando con claridade e segue sen romper a mala serie que o agonía fóra da casa.