O Congreso dá luz verde aos 11 novos conselleiros de RTVE

O Consello de Administración de RTVE xa conta con once dos quince conselleiros que contempla a nova norma para renovar a este órgano de dirección -outros catro elíxeos o Senado-, despois de ser apoiados este xoves, en segunda rolda, pola maioría absoluta do Congreso dos Deputados.

Por 179 votos a favor, a suma dos votos do PSOE, Sumar, ERC, Junts, Bildu, PNV e os dos deputados do Grupo Mixto (Podemos, BNG, CC e José Luis Ábalos), o Congreso aprobou aos once candidatos a conselleiros pactados por estes grupos, que tiveron de novo enfronte ao PP e Vox. Os deputados da oposición non participaron na votación.

Dos once conselleiros, cinco foron propostos polo PSOE. Son José Pablo López, exdirector de Contidos Xerais de RTVE; Esther de la Mata, directora de Comunicación do Ministerio de Félix Bolaños e conselleira externa independente do Consello de Administración da Axencia EFE; Angélica Rubio Cerezales, directora de elplural.com; Rosa León Conde, cantautora e política, traballou en espazos televisivos de TVE dedicados aos nenos; Mercedes de Pablos, xornalista e escritora, exerceu a súa carreira profesional en Andalucía. 

Sumar propuxo a Marta Ribas e a María Teresa Martín del Caz. ERC a Sergi Sol i Bros e Junts a Miquel Calçada Olivella. A conselleira proposto polo PNV é María Solaina e completa a lista Mariano Muniesa de Caveda, candidato de Podemos.

O PP non queda sen conselleiros en RTVE

O PP ocupará catro postos no Consello. Rexistrou finalmente as candidaturas que serán sometidas a votación no Senado.  A proposta  encabézaa o director de TVE entre 2016 e 2019, Eladio Jareño. Tamén están o exsecretario de Estado coas Cortes e exsecretario xeral de Sanidade e Consumo, Rubén Moreno; a xornalista Marina Vila Menor e Ignacio Ruiz Jarabo, que foi presidente da SEPI de 2001 a 2004.

Está previsto que os catro comparezan este venres na comisión de Nomeamentos do Senado.