Protestas na rúa contra o ditame do Constitucional francés sobre as pensións
Protestas na rúa contra o ditame do Constitucional francés sobre as pensións
As manifestacións deixan disturbios en varias cidades e máis dun cento de detencións en París
Os sindicatos convocan unha "gran mobilización popular" o 1 de maio para tentar frear a lei
![](https://img-g24-crtvg.flumotion.com/prog24/2023/20230415/202304145180WD-FRANCE-PENSIONSCONSTITUTION-PROTEST_STR_O__frame_2609.png)
O Consello Constitucional francés validou o atraso da idade mínima de xubilación de 62 a 64 anos, a principal medida da reforma das pensións aprobada polo Goberno do presidente Emmanuel Macron.
Ademais, o organismo rexeitou a solicitude de que a reforma das pensións sexa sometida a un referendo de iniciativa cidadá, segundo anunciou nun comunicado.
Porén, invalidou seis artigos da lei, especialmente dous relativos ao fomento da contratación de persoal maior de 55 anos nas grandes empresas, ao considerar que non tiñan lugar nunha lei de financiamento da Seguridade Social.
Unha fonte do organismo explicou á prensa que, ao validar o aumento a 64 anos, os seus nove membros tiveron en conta "que o lexislador busca a supervivencia do sistema por repartición, tendo en conta ademais o aumento da esperanza de vida".
Tamén indicou que as deliberacións se estenderon durante 16 horas seguidas, pero rexeitou dicir se a decisión foi ou non por unanimidade.
A fonte anunciou que o Consello Constitucional estudará o vindeiro 3 de maio unha nova solicitude de referendo de iniciativa cidadá, pero cunha cuestión diferente á exposta ata o de agora.
A nova petición inclúe esta vez unha disposición que propón un novo imposto relacionado co mantemento do sistema de pensións que si que supoñería "un cambio do Estado de dereito" admisible polo Consello.
Manifestacións
Pouco tempo despois de que se divulgara o agardado ditame, convocáronse varias manifestacións e concentracións.
En París, houbo queima de mobiliario urbano, entre eles unha trintena de colectores de lixo, e enfrontamentos entre policía e manifestantes co resultado de 112 detencións.
Rennes, no nordés do país, foi outra das cidades que rexistrou disturbios salientables. Ao termo dunha protesta de varios centos de persoas, queimaron a porta dunha comisaría de policía e a entrada dun antigo edificio relixioso.
Nunha mensaxe en Twitter, o ministro do Interior, Gérald Darmanin, tachou de "inaceptables" ambos os dous incidentes e asegurou que os seus autores responderán ante a Xustiza.
A pesar da presión social e política, o Goberno ten a intención de promulgar a lei esta mesma fin de semana, segundo fontes oficiais a medios locais, tras un veredicto que xerou reaccións contrapostas na clase política francesa.
![](https://img-g24-crtvg.flumotion.com/prog24/2023/20230415/202304145132WD-FRANCE-PENSIONSCONSTITUTION-ANALYST_O__frame_657.png)
Gran mobilización
Os sindicatos convocaron unha "gran mobilización popular" para o 1 de maio, que consideran debe ser un momento "histórico" para frear a reforma, anunciou a secretaria xeral da Confederación Xeral do Traballo (CXT), Sophie Binet, durante unha protesta en París.
Segundo explicou, pídenlle a Macron que "volva ao sentido común" e devolva a lei á Asemblea Nacional para que se poida debater e votar", xa que se aprobou sen un voto nesa cámara (o goberno accionou un artigo constitucional que llo permitía).
Os oito principais sindicatos do país reuniranse o vindeiro luns para estudar novas medidas de protesta, despois de doce xornadas de folgas e mobilizacións a nivel nacional desde o mes de xaneiro.
![](https://img-g24-crtvg.flumotion.com/prog24/2023/20230415/202304145158WD-FRANCE-PENSIONSCONSTITUTION-REAX_MORE_O__frame_6976.png)