O líder sirio chama á paz e anuncia un comité para investigar a matanza de civís

O presidente interino sirio, Ahmed al Sharaa, apelou este domingo á "paz civil" e anunciou a formación dun comité "independente" para investigar os enfrontamentos armados e as matanzas que segaron a vida de máis de 1.300 persoas.

O mandatario chamou á calma e anunciou a súa intención de remitir á xustiza os responsables dos masacres, na peor vaga de violencia que se rexistra no país en anos. 

"Temos que protexer a unidade nacional e a paz civil", afirmou nun discurso ofrecido nunha mesquita de Damasco de madrugada.

Segundo o Observatorio Sirio de Dereitos Humanos, polo menos 830 civís morreron en catro días na campaña militar desenvolvida polas forzas de seguridade no oeste do país, como vinganza sectaria tras os ataques lanzados o xoves pasado por grupos leais ao derrocado Bachar al Asad,

Un mes para probar o que ocorreu

Al Sharaa anunciou a formación dun comité "independente" para investigar as "violacións contra civís" e dar coas persoas responsables da "comisión de delitos".

Este comité está formado por cinco xuíces, un xeneral de brigada e un avogado, informou a presidencia siria nun comunicado asinado por al Sharaa e no que se identifican con nome e apelidos os seus membros.

Os sete van ter trinta días para enviar o informe, despois de cumpriren coas tarefas encomendadas, entre elas, "revelar as causas, circunstancias e condicións que levaron" a estes eventos e "investigar as violacións contra civís e identificar os responsables".

Este comité súmase ao formado a véspera polo Ministerio de Defensa, que ten como obxectivo "mandar a xuízo militar" os infractores durante as operacións na costa mediterránea siria.

De acordo co Observatorio Sirio de Dereitos Humanos, morreron 830 civís, 231 membros das forzas de seguridade e 250 militantes leais ao antigo réxime. 

A ONG fixo un chamado "urxente" para "responsabilizar o persoal de seguridade e defensa implicado nas execucións sobre o terreo" contra a minoría alauita, rama do islam xiíta á que pertence o expresidente al Asad e que fora privilexiada durante o seu réxime.

Condenas internacionais

O Alto Comisionado das Nacións Unidas para os Dereitos Humanos, Volker Türk, dixo este domingo que está a recibir información de Siria sobre execucións sumarias de cariz sectario.

O secretario de Estado norteamericano, Marco Rubio, afirmou nun comunicado que o seu país condena "os terroristas islamitas radicais, incluíndo xihadistas estranxeiros, que asasinaron persoas no oeste de Siria nos días recentes".

Regresa a "normalidade" na costa

O Ministerio de Defensa sirio afirmou que as forzas de seguridade restableceron "a estabilidade" nas provincias costeiras do oeste do país tras os catro días de violencia.

O portavoz do Ministerio de Defensa, Hasán Abdulghani, asegurou nun comunicado que os combates cesaron nas provincias occidentais do país e que, agora, as forzas de seguridade iniciaron unha "segunda fase das operacións militares" para "perseguir" os oficiais do réxime derrocado.

A axencia oficial de noticias siria SA indicou que "os mercados e a vida normal empezaron a volver á cidade de Jableh (onde comezaron os ataques), nos arredores de Latakia, despois de que se limpara de restos do antigo réxime e se restablecera a seguridade en todos os seus barrios".

Membros das forzas sirias en Latakia. REUTERS/Karam al-Masri