O papa deixou no testamento a súa vontade dunha tumba sinxela en Santa María a Maior

O papa Francisco deixou escrito no seu testamento, publicado este luns, a súa vontade de ser enterrado nunha capela na basílica romana de Santa María a Maior e nunha tumba sinxela.

"Solicito que o meu sepulcro sexa preparado no nicho da nave lateral entre a Capela Paulina (Capela da Salus Populi Romani) e a Capela Sforza da citada Basílica Papal, como se indica no documento adxunto.

O sepulcro debe estar na terra; sinxelo, sen decoración particular e coa única inscrición: Franciscus", lese no texto publicado tras a súa morte.

 O documento, que ten data do 29 de xuño de 2022, foi feito público despois de ser trasladado á capela da súa residencia na Casa Santa Marta.

"Sentindo que se achega o fin da miña vida terrea e con viva esperanza na Vida Eterna, desexo expresar a miña vontade  respecto ao lugar da miña sepultura. Sempre confiei a miña vida e o meu ministerio sacerdotal e episcopal á Nai do noso Señor, María Santísima. Por iso, pido que os meus restos mortais descansen en espera do día da resurrección na Basílica Papal de Santa María a Maior", lese no testamento.

E engade: "Desexo que a miña última viaxe terreal conclúa precisamente neste antigo santuario mariano onde fun orar ao comezo e ao final de cada viaxe apostólica para manifestar con confianza as miñas intencións á Nai Inmaculada e agradecerlle o seu coidado dócil e maternal".

O papa indica ademais que os gastos para a preparación do meu enterro serán cubertos pola suma do benefactor que dispuxo e que será "entregada a Santa María a Maior e da cal dei instrucións oportunas a monseñor Rolandas Makrickas, comisionado extraordinario do Capítulo Liberiano".

Francisco conclúe as súas vontades pedindo: "Que o Señor conceda a recompensa merecida a quen me ame e continuará orando por min.".

"Ofrecín ao Señor o sufrimento que se fixo presente na última parte da miña vida pola paz no mundo e a fraternidade entre os pobos", termina o testamento. 

Milleiros de fieis rezan na Praza de San Pedro

Milleiros de persoas congregáronse este luns na Praza de San Pedro do Vaticano para rezar polo papa Francisco.

Durante o acto, o pontífice foi lembrado como un "peregrino da esperanza".

O cardeal italiano Mauro Gambetti presidiu o rezo do rosario, que xuntou milleiros de fieis na praza, ao pé da basílica vaticana. Durante a súa intervención, recordou a frase coa que o papa Francisco adoitaba despedirse dos fieis: "Por favor, non se esquezan de rezar por min".

"Queremos facelo esta tarde para acompañalo na súa Pascua, na fe en Cristo resucitado. Sabemos que a morte non é unha porta que se pecha, senón a entrada na Xerusalén celeste, onde o pranto se transforma en danza", proclamou Gambetti.

O cardeal agradeceu "os dons que o ministerio do papa Francisco concedeu á Igrexa" e destacou a súa figura como "peregrino dunha esperanza que non decepciona". Rematou lembrando que "á nosa voz orante úneselle a dos irmáns e irmás de todo o mundo e de toda a grea de Cristo, o Bo Pastor".

Lecturas con presenza feminina destacada

Despois de que o coro entoase o Gloria Patri, dúas relixiosas participaron nas lecturas: Raffaella Petrini, secretaria xeral da Gobernación do Estado do Vaticano e primeira muller en ocupar ese cargo, e Alessandra Smerilli, responsable do Dicasterio para o Servizo do Desenvolvemento Humano Integral.

Ambas representan o impulso que o papa Francisco deu ao papel da muller na Igrexa durante o seu pontificado.