O Parlamento alemán retira a confianza ao chanceler Olaf Scholz, polo cal, haberá eleccións
O Parlamento alemán retira a confianza ao chanceler Olaf Scholz, polo cal, haberá eleccións
Un total de 394 dos 717 deputados votaron negarlle a confianza, mentres que 207 apoiaron a súa continuidade e 117 abstivéronse
Está previsto que os alemáns acudan ás urnas o próximo 23 de febreiro
O chanceler alemán Olaf Scholz tras perder o voto de confianza no Parlamento. REUTERS / Liesa Johannssen
O chanceler alemán, Olaf Scholz, perdeu este luns a moción de confianza á que se someteu fronte ao Parlamento alemán tras quedar o seu Goberno en minoría, co que o país centroeuropeo celebrará eleccións xerais anticipadas, que están previstas para o próximo 23 de febreiro.
Un total de 394 deputados de 717 que entregaron o seu voto negáronlle a confianza, 116 abstivéronse e 207 votaron a favor da súa continuidade, anunciou a presidenta da Cámara Baixa, Bärbel Bas.
Os deputados que reafirmaron a súa confianza en Scholz pertencen ao Partido Socialdemócrata (SPD) do chanceler, pero votou a favor polo menos unha deputada da ultradereitista Alternativa para Alemaña (Afd), que considerou que é peor que chegue ao poder o líder da oposición democristiá, Friedrich Merz, que encabeza as sondaxes.
Os Verdes, que contan con 117 deputados no hemiciclo, anunciaran que se absterían para garantir que o chanceler perdese a votación e puidese disolverse o Parlamento.
Scholz xa adiantara en novembro a súa intención de perder o voto deste luns cando rompeu a coalición de socialdemócratas, verdes e liberais que presidía e estes últimos foron expulsados, deixando un Goberno en minoría.
No seu discurso previo á votación, o chanceler expuxo os comicios anticipados como un referendo sobre a política económica do Goberno nun momento no que afonda a recesión en Alemaña e aumenta a incerteza a nivel global.
Así, avogou por permitir un maior endebedamento estatal co que financiar investimentos masivos en infraestruturas e en seguridade, para relanzar a economía e ao mesmo tempo garantir a protección do país fronte a ameaza procedente da invasión rusa de Ucraína.
"Hai que activar a panca, e hai que facelo agora", afirmou, tras sinalar que os cidadáns deben decidir se se inviste na economía "con forza e determinación ou de forma mesquiña e vacilante".
Na súa réplica, Merz acusou o chanceler de non cumprir as súas promesas sobre a modernización do Exército por mor da guerra en Ucraína e de sumir ao país nunha crise económica, cuxa solución non pode pasar por hipotecar o futuro das próximas xeracións con máis débeda, segundo dixo.
Tras perder o voto, Scholz dirixíase ao Palacio de Bellevue para entrevistarse co presidente da República Federal Alemá, Frank-Walter Steinmeier, para pedirlle que disolva o Parlamento.
Este dispón ata o 6 de xaneiro para tomar unha decisión e está previsto que a realice antes, aínda sendo unha mera formalidade, unha rolda de contactos cos xefes dos partidos democráticos.
A Constitución prevé que entre a disolución do Parlamento e a data dos novos comicios medien como máximo dous meses, pero a data con que traballan todas as forzas políticas, pactada polo Goberno e a oposición, precisamente a pedimento de Steinmeier, é a do 23 de febreiro.
