Os países da UE validan rebaixar a protección do lobo na lexislación comunitaria

O Consello da Unión Europea, que representa aos países, deu luz verde á proposta para reducir o nivel mínimo de protección do lobo na normativa comunitaria e aliñalo co novo estatuto adoptado no Convenio de Berna, rebaixado a pedimento da UE ante a recuperación das poboacións e o incremento de ataques ao gando.

Nun comunicado, o Consello explicou que valida que o lobo pase de estar catalogado como "estritamente protexido" a só "protexido", o que daría aos Estados membros máis flexibilidade para xestionar as súas poboacións desta especie.

"O obxectivo é ofrecer máis flexibilidade na xestión das poboacións de lobos nos distintos países da UE, co fin de mellorar a coexistencia e minimizar o impacto da crecente poboación da especie, incluídos os retos socioeconómicos", dixo o Consello.

O cambio aliña a lexislación comunitaria cunha modificación do Convenio de Berna solicitada pola propia Unión Europea, que en setembro pedira pasar o estatuto de protección do anexo II ao III.

Baixo o réxime do Anexo II está prohibida calquera forma de captura intencional ou de morte intencional -o que inclúe a caza-, así como a destrución ou a deterioración dos espazos de reprodución ou das áreas de descanso. Tamén está proscrito o comercio e a detención destes animais.

Pero co Anexo III as cousas cambian, xa que a regulamentación si que permite algunhas desas prácticas a condición de "manter a existencia desas poboacións fóra de perigo".

"Aínda que os lobos xa non estarían baixo o estatuto de especies estritamente protexidas, os Estados membros deberían seguir garantindo o estatuto de conservación favorable do lobo e aplicar medidas de seguimento que poden levar a prohibicións temporais ou locais da caza", sinalou o Consello.

(Europa Press/WWF)

Cada país seguirá, ademais, tendo a posibilidade de manter un nivel de protección máis alto se así o considera necesario segundo a súa lexislación nacional. De feito o Goberno español aliñábase cos de Irlanda, Eslovenia, Chipre, Malta e Bélxica entre aqueles que defenden seguir mantendo un alto nivel de protección para o lobo.

Non obstante, o 20 de marzo pasado, o Congreso, en contra da posición do Executivo, votou a favor de eliminar a prohibición da súa caza ao norte do Douro. Logo desa votación, a Xunta anunciou que autorizará batidas en casos de danos recorrentes á gandería.

As chamadas "comunidades lobeiras" (Galicia, Castela e León, Asturias e Cantabria) levan varios anos metendo presión en Bruxelas para forzar un cambio na normativa e reclamando en España que aplique os protocolos máis permisivos nas áreas onde os ataques ao gando son frecuentes.

O Parlamento Europeo votará sobre esta medida no seu próximo pleno na primeira semana de maio.