Os sectores produtivos volven á actividade de xeito gradual

O fallo eléctrico deste luns afectou a produción en toda Galicia. Na Coruña o primeiro sinal de alarma deuno a refinería, onde se accionaron os sistemas de seguridade dos fachos. Pronto, a subministración eléctrica interrompeuse, pero tamén o servizo da auga nalgúns puntos da cidade. A posta en marcha do complexo industrial será un proceso graduado que durará varios días, segundo informan fontes da compañía consultadas por Europa Press.

En Vigo, Stellantis viuse obrigada a paralizar a produción. Este martes á mañá a factoría recuperaba a actividade coa entrada ao traballo da quenda da mañá, ás 6:00, aínda que con dificultades no rearranque, que se foron resolvendo co paso das horas.

En Alcoa San Cibrao a falta de enerxía tamén obrigou a parar a produción na planta de alumina. Porén, esta mañá o comité de empresa informaba de que, a pesar de que o complexo industrial se mantivo sen enerxía durante oito horas, o traballo do persoal permitiu superar "de forma positiva" o "limiar de supervivencia" das instalacións. Agora mesmo aseguran que continúan co rearranque "con dificultades, pero sen ningún fallo crítico".

En Ferrol o persoal de Navantia regresou ás oito e media da mañá ao estaleiro tras o apagamento eléctrico masivo deste luns. Segundo os comités de emerxencia das plantas públicas da ría ferrolá, as instalacións están operativas e recuperaron a subministración enerxética habitual, polo que as dependencias volven ser seguras, e pódese entrar de forma graduada.

Na siderúrxica Megasa, situada no municipio de Narón, encárase tamén o inicio de actividade tras un día complicado. Carlos Bascoy, presidente do comité de empresa do complexo, subliñou que se prevé volver máis ou menos á normalidade. Prevén realizar un reinicio de actividade similar ao das paradas técnicas que levan a cabo habitualmente no recinto.

A fábrica de Ence en Pontevedra mantivo a normalidade "en todo momento" a través da xeración interna de enerxía, tanto eléctrica como térmica, segundo destacan fontes da compañía consultadas por Europa Press. "Puidemos manter a operación grazas a que somos enerxeticamente autosuficientes", destacan ditas fontes, que sinalan que o que fixo a factoría durante as horas que se prolongou o apagamento foi desacoplarse da rede.

As fábricas de Finsa estiveron paradas por mor do apagamento e ao mediodía deste martes están "todas recuperando a actividade", apuntan fontes da empresa consultadas por Europa Press.

Tamén noutros puntos de grande actividade da xeografía galega, como o porto de Vigo, afirman estar "a traballar con normalidade". Ás 4:15 horas procedeuse á apertura da lonxa e o mercado.

O sector galego do metal volveu á normalidade pero afronta con "graves consecuencias" a paralización de producións e fabricacións a partir das 13:00 horas do luns. O secretario xeral de Asime (Asociación de Industrias do Metal e Tecnoloxías Asociadas de Galicia), Enrique Mallón, explica que houbo "cero actividade practicamente" desde as 15:00 horas.

Ademais, "elimináronse quendas de noite", aínda que "a gran maioría das empresas a partir das 6:00 horas traballaron con total normalidade, salvo o ter que poñer en marcha moitas máquinas, algunhas de extrema complexidade, con sistemas tecnolóxicos avanzados que levan horas poñelos en funcionamento". A situación é "idéntica" en todo o territorio de Galicia, segundo indica Mallón.

En canto ao comercio, tendas, bancos e grandes superficies abriron as súas portas unha vez se recuperou a subministración en case o cen por cento do territorio. As maiores dificultades viñeron dadas polas avarías puntuais e o reinicio dos equipamentos que impediron a súa actividade.

O comercio galego recupera a normalidade tras o "gran descontrol" provocado polo apagamento na rede eléctrica sufrido este luns e perdas en sectores como o do pan ou negocios que venden produtos perecedoiros. 

O presidente da federación galega de comercios, José María Seijas, constata que foi unha xornada "que se perdeu de vendas" e que "os gastos seguen correndo", aínda que valora que non houbo outras incidencias destacables.

A operativa de tarxetas a través da plataforma Redsys recuperouse na práctica totalidade dos grandes comercios, e as oficinas bancarias e os caixeiros tamén operan con normalidade, salvo algunhas incidencias illadas.

O feito de dispoñer de grupos electróxenos nas granxas permitiu que o apagamento non interrompese a actividade nas explotacións galegas e, concretamente, que a falta de subministración non afectase a muxidura e a conservación do leite nos tanques de frío.

A  industria cárnica española cifra en ata 190 millóns de euros as perdas polo apagamento, polo que pediu axudas ao Goberno central ante un "desastre sen precedentes".